Read Paite Chin JOB 9 Bible Online

JOB 9 - Paite Chin bible

JOB 9

¹Job in a dawng a, hichi in a chi hi:

²“Chihtaktak in huchi ahi chih ka thei hi: himahleh Pathian lak ah mihing bangchi in a dik thei dia?

³Amah kiselpih a utlam ahihleh, sang khat lak a khatvei zong amah a dawng theikei ding hi.

⁴Amah lungtang in a pil a, hatna in thil a hihthei ahi: amah dou in kua a kikhauhsak in, a lohchingta a oi?

⁵Mualte a suan a, a theikei ua, heh a amaute a lumleh lai in.

⁶A mun a kipan in lei a sing a, huan huai a khuamte a ling uhi.

⁷Ni thu a pia a, a suakkei; aksite a bilhkhum ngiungeu hi.

⁸Amah kia’n vante a phalhkhia a, tuipi kihot tung ah a pai hi.

⁹Aman Jangkhua, Zuheisuktun, Siguk leh simlam aksi munte a bawl hi.

¹⁰Aman suitheih vuallouh thil thupite sim zohlouh thillamdangte a hih hi.

¹¹Ngai in, ka kiang ah a pai a, amah ka mu kei: a pai lailai a, himahleh amah ka mu kei hi.

¹²Ngai in, samat a man a, amah kuan a khamthei dia? Bang hih na hia? Kuan a kiang ah a chi dia?

¹³“Pathian in a hehna a lakik kei ding; Rahab panpihmite amah nuai ah a kun petmah uhi.

¹⁴Bangchiphet a tawmzaw in amah ka dawng in, amah toh ngaihtuah ding in ka thute ka telkhe dia hia?

¹⁵Diktatta zong leng amah ka dawngkei ding hi; ka gal kiang ah thilngetna ka bawl theilel ding hi.

¹⁶Amah sam in hon dawng mahleh; ka aw a ngaikhia chih ka um kei ding hi.

¹⁷Huihpi in a hon kitamsak a, a san omlou in ka liamnate a pungsak hi.

¹⁸Ka nak a hon phalkei a, himahleh thangpaihna in hon dimsak hi.

¹⁹Hatna thu genleng, ngai in, Amah a hat hi: vaihawmna thu, kuan hun a honpe dia?

²⁰Ki diktatsak leng, ka kam mah in a hon mawhpaih hi: hoihkim ta zongleng, hoihlou in a hon telsak ding hi.

²¹Hoihkim mah leng, ka kilimsak kei; ka hinna ka musit hi.

²²A kibang ahivek a; huaiziak in ken, hoihkim leh gilou a hihse tuak, ka chi hi.

²³Jepna in thakhat in that leh, mi hoih thuakna a nuihsan ding hi.

²⁴Lei migilou khut a piak a a om chiang in huai a vaihawmmite maituam a; amah ahihkeileh, kua ahita dia?

²⁵“Tuin ka nite laihawmmi sang in a kin zaw a a taimang ua, hoih a mu kei uh.

²⁶Long kinte bang in a paimang ua, muvanlai samat tung a ngumkiak bang in.

²⁷Ka phunna ka mangngilh dia, ka mel lungkham ka pai dia, ka kipak ding, chi leng.

²⁸Ka lungkhamna tengteng ka lau a, hoih n’on sa kei ding chih ka thei hi.

²⁹Mawhpaih in ka om dia; bangdia a thawn a semgim ka hia?

³⁰Vuk tui in kisil in, ka khutte siangsak kei leng;

³¹Hinapi in guam ah n’on pailut dia, keimah puante’n a hon kih ding uhi.

³²Kei bang mihing ahi kei a, amah ka dawn theihn a, vaihawmna a ka hoh khawm theihna ding un.

³³Ka kikal uah kougel hon mattheihna ding in, thulaigenmi a omkei hi.

³⁴Kei apan in a chiang lamang henla a kihtakhuaina in kei hon lausak kei hen:

³⁵Huaichiang in thu ka gen dia, amah ka lau kei ding: keimah ah huchibang ka hi ngalkei hi.”