Read Paite Chin SAM 10 Bible Online

SAM 10 - Paite Chin bible

SAM 10

¹TOUPA aw, bang achia gamlapi a ding nak na hia? Bang achia mangbat lai bang a kisel nak?

²Migilou salou kisaktheihna ziak in mi gentheite delh in a om uhi, a thil gilou ngaihtuah khiakte uah amau mah awk uhen.

³Migilou salou in a lungtang utlam a suang, mi huaiham in Toupa a paikhia a, a musit hi. TOUPA a paikhia a, a musit hi.

⁴Migilou salou in kisaktheih melpu in, A phut kei ding, a chi hi. A ngaihtuahna tengteng tuh, Pathian a omkei, chih ngen ahi.

⁵A omdante tuh chiklaipeuh in leng a kip a; na vaihawmnate tunglam gamlapi ah, a muh bat louh ah, a om hi: Amah doute tengteng lah a nuihsan maimah ngal a;

⁶A lungsim in, Ka ling kei ding; khang tengteng tan in mangbang in ka omkei ding, a chi hi.

⁷A kam hamse lohnate, khemnate, engbawlnate in a dim a; a lei nuai ah thilhihkhelhna leh siatna a om hi.

⁸Khawteng a guktanna munte ah a tu zel a; mun dai ah khelhna neilou mite a that zel hi: a mit in genthei mite a guktan nak ahi;

⁹Humpinelkai in a kua a a guktan bang in aman mundai ah a guktan zel hi; mi genthei man ding in a tang zel a: mi genthei a man ngei a, huchin a len in a kaimang nak hi.

¹⁰A khupboh a, a kun a, bangmah hih theilou A mihatte uh hihpuk in a om nak uhi;

¹¹A lungsim ah, Pathian in a mangngilh ahi: a mai a sel a, chikmah chiang in a mu kei ding, a chi.

¹²TOUPA aw, thou in; Pathian aw, na khutlik in: mi gentheite mangngilh ken;

¹³Bangziak in ahia migilou salou in Pathian a muhsit, a lungsim a, Na phut kei ding, a chih nak?

¹⁴Muh zaw na mu khin tham a; na khut a thuk ding thil hihkhial leh hihvuina na en a: migentheite na kiang ah a ki kemsak ua; Pa neilou panpihpa na hi hi.

¹⁵Migilou salou ban sutan inla, migilou, gitlouhna zongkhia in, na muh het louh mateng;

¹⁶TOUPA tangtawn tangtawn adin Kumpipa ahi a: namte amah gam a pan in a mangthang uhi.

¹⁷TOUPA, kingainiamte deihna na ngaikhia a: a lungtang uh na kisa sak ding a, A bil un leng na za sak ding hi:

¹⁸Pa neiloute leh engbawlte, leitung min a engbawl nawnlouhna ding un, a vai uh hawmsak in.