Read Paite Chin SAM 102 Bible Online

SAM 102 - Paite Chin bible

SAM 102

¹TOUPA aw, ka thumna ngaikhia inla, ka kikou husa na kiang hongtung hen.

²Ka mangbat ni’n ka lak ah na mai sel kenla: kei lam ah na bil hondoh in; k’on sap chiang in hon dawng pah in.

³Ka damsung nite meikhu bang in a zam mang a, ka guhte taptung bang in a sa hi.

⁴Ka lungtang loupa bang in hailum in a om a, a vuaita hi; tanghou nekding ka mangngilhta ngal a.

⁵Ka thum husa ziak in ka guhte ka sa ah a belh bikbek ahi.

⁶Gamdai tuivapi bang ka hi a: khaw tul simbu bang ka hita hi.

⁷Ka hak gige a, kawlgit in tung a amah kia a om bang ka hita hi.

⁸Hondoute’n nitum in hon gensia ua: ka tung a hangsante’n keimah bang a om ding in hamsia a lou uhi.

⁹Vut an bang in ka ne a, ka dawn ding in khitui toh ka helta ngal a.

¹⁰Na lunghihlouh mahmah leh na heh ziak in: nang n’on domkang a, n’on paimangta hi.

¹¹Ka damsung nite limliap kiam bang ahi a; loupa bang in ka vuaita hi.

¹²TOUPA aw, nang bel tangtawn in na om ding a; nangmah theihgigena suan tengteng tan in a omlai ding hi.

¹³Na thou ding a, Zion tang na hehpih ding a: amah lah hehpih a hunta ngal a, ahi, hun seh a tungta hi.

¹⁴Na sikhate’n a suangte a it un, a leivui leng a hehpih ngal uhi.

¹⁵Huchi in namchih in TOUPA min a lau ding ua, lei a kumpipate tengteng in na thupina leng a lau ding uhi.

¹⁶TOUPA’N Zion a dinsak hun in, a thupina in a hong kilang ding hi;

¹⁷Tagahte thumna a limsak a, a thumna uh a musit kei hi.

¹⁸Huai khangthak hongom dingte ading in gelh ahi ding a: nam siam a hongom ding in TOUPA a phat ding hi.

¹⁹Aman a Mun Siangthou sangpi a kipan in a en suk a; TOUPA’N van a kipan in lei a mu a;

²⁰Suangkulhtang thum ngaikhe ding leh, si ding a sehte sut ding in;

²¹Huchi a mite’n Zion ah TOUPA min a genthang ua, Jerusalem a a phatna a genthang theihna ding un.

²²Mite a kikhawm khawm ua, kumpigamte toh, TOUPA nasem ding in.

²³Aman lam lak ah ka tha a bahsak a; ka damsung a hihtom hi.

²⁴Ka Pathian aw, ka hatlai nite in honla mang ken, ka chi a: Nang kum suan omsung tengteng in a om ding hi.

²⁵Leitung kingakna nidang a na phumsa ahi a; vante leng na khutsuak ahi.

²⁶Huaite tuh a hong mang ding a, nang zaw na om den ding hi: ahi, huai tengteng puansilh bang in a honglui ding ua; puan bang in na khek ding a, a hong lamdangta ding hi.

²⁷Nang zaw na ngeingei a, na kumte’n bei ni a neikei ding.

²⁸Na sikhate tate a om gige ding ua, a suante uh na ma ah hihkip in a om ding uhi.