Read Paite Chin SAM 103 Bible Online

SAM 103 - Paite Chin bible

SAM 103

¹Ka hinna aw, TOUPA phat inla; ka sung a om tengteng aw, A min siangthou phat in!

²Ka hinna aw, TOUPA phat inla, a thilhih hoih tengteng mangngilh ken.

³Aman na thulimlouhna tengteng a ngaidam a; na natna tengteng a hihdam hi.

⁴Manthatna lak a kipan na hinna a tan a; chitna leh lainatnate a hon khusak hi.

⁵Na kam thil hoih in a taisak a; huchi in na valnouna muvanlai bang a siam thak in a om nawn hi.

⁶TOUPA’N, nuaisiahna thuak tengteng ading in thil kizente hihsak in, vai a hawmsak nak hi.

⁷A lampite Mosi a theisak a, a thilhihte Israel suante leng a theisak hi.

⁸TOUPA lainatna a dim, mi hehpihthei tak, lungnel tak, chitna hau tak ahi.

⁹Aman a taikei ding a; a hehna a pai nilouhlouh sam kei ding hi.

¹⁰I khelhnate bang in i tung uah a hih kei a, i thulimlouhnate bang in a honthuk sam kei hi.

¹¹Van leitung sang tak a a om bang in, amah laute tung ah a chitna a lian mahmah ahi.

¹²Suahlam leh tumlam a kigamlat bang in, I tatleknate tuh eimah a kipan in a koih mangta hi.

¹³Pa’n a tate a hehpih bang in, TOUPA’N amah laute a hehpih hi.

¹⁴I pumpi kibawldan a thei a, leivui lel ihi chih a theih ziak in.

¹⁵Mihing damsung nite loupa bang ahi a; pawn a pak bang in a lun hi.

¹⁶Huih in a mut a, a mang hi; a omna mun in a thei nawnta kei ding hi.

¹⁷TOUPA chitna bel amah kihtate tung ah tangtawn apan tangtawn pha in a om ding a, a diktatna leng a ta suan a tu suan tan un a om ding hi.

¹⁸A thukhun zui peuhmahte leh, a thuhilhte man tum a theigige peuhmahte tung ah.

¹⁹TOUPA’N a mangtutphah van ah a hihkip a; a gam in bangkim tung ah vai a hawm hi.

²⁰A thu ngaikhia a, a thumang nou a angelte aw, hatna a thupite aw, TOUPA phat un.

²¹A sepaihte aw, a deihlam hih a nasemte aw, TOUPA phat un.

²²A vaihawmna mun peuhmah a a thilhih tengteng aw, TOUPA phat un: ka hinna aw, TOUPA phat in.