Read Paite Chin SAM 104 Bible Online

SAM 104 - Paite Chin bible

SAM 104

¹Ka hinna aw, TOUPA phat in, TOUPA ka Pathian aw, nang na thupi mahmah a; pahtawina leh thupina in na kithuam hi.

²Nang vak puan bang in na silh a; vante puanin tung bang in na kaipalh a;

³Aman a dantan sunggil kalvaite tuite ah a khung a; meipi kangtalai in a bawl a; huih kha tung ah a vak hi:

⁴Aman angelte huih a suaksak a; a nasemte meikuang zuazua a suaksak hi.

⁵Leitung kingaknate na phum a, tangtawn a a lin louhna ding in.

⁶Nang leilung thukpi puan bang in na silhsak a; tuite tang tung te ah a om pheuphou hi.

⁷Na taihilhna ziak in a taimang a; na vanpiging husa ziak in a paimang pah hi;

⁸Tang tung ah a paitou a, guamte ah a paisuk a, amah dia mun na bawlsakna lam ah.

⁹A kan louh ding in gi na khung a, lei tupmang ding a a kiknawn tak louhna ding in.

¹⁰Aman guamte ah luinak a sawl khia a; tangkalte kikal ah a luang hi.

¹¹Huaite’n gamsate kiang ah dawn ding tui a pia ua; Gam sabiltungte’n a dangtak uh a hihdai uhi.

¹²A dung uah tungleng vasate’n omna a nei ua, singbawk lak ah a ham uhi.

¹³Aman a dantan tungnung a kipan in tangte tui in a vak a: lei na thilhih gahte in a vak a: lei na thilhih gahte in a tai uhi.

¹⁴Gante a ding in loupa a pousak a, mihing zatdin haichi a pousak hi: lei a kipan nekding a pawtna ding in:

¹⁵Mihing lungtang kipahsakna uain toh, a mai kilawmsakna ding thau toh, mihing lungtang hihhatna tanghou toh.

¹⁶TOUPA singte tui in a dim ua, Lebanon tang a a suan sidar singte mah,

¹⁷huai ah vasate’n bu a sep ua: vaiva bel meilah singte a inn ahi.

¹⁸Tang sangte sathak ading ahi a; suangpite zusapi ading in kihumbitna ahi.

¹⁹Aman kha hunbi theihna ding in a sep a: ni in tum hun theigige hi.

²⁰Nang mial na bawl a, zan a hong hizel hi, huai hun in gamnuai a sa khempeuhte a ta khia uhi.

²¹Humpinelkai hatlaite’n a sa mat ding uh humham khum in, Pathian kiang a kipan a nekding uh a zong uhi.

²²Ni a suak a, a pai mang ua, a omna khuk chiat uah a kual zel uhi.

²³Mihing nasem in a pawt a, nitaklam tan in a semgim hi.

²⁴TOUPA aw, na thilhihte tam hina tel e! Pilna in na bawl vek ahi; leitung na hauhsakna in a dim hi.

²⁵Pam ah tuipi a om a, thupi, lianpi tak, huai ah thil bokvak a pai sim zohlouh a om a, sa neu leh sa liante.

²⁶Huai ah meilong liante a pai uh; huai ah Ole a om, asung a mawl ding a na bawl ngei.

²⁷Huaite teng in a honngak chiat ua, a huntak a a an uh na piak zelna ding in.

²⁸A kiang ua na piakte a tawm ua; na khut na zak a, na hoihna in a tai uhi.

²⁹Na mai na sel a, a lungzing ua, a hatna uh na laksak a, a si ua, amau leivui ah a kiknawn uhi.

³⁰Na kha na sawl khia a, siam in a om zel uhi; leitung na bawl thak zel hi.

³¹TOUPA thupina tangtawn in om henla; TOUPA a nasep ah nuam hen:

³²Aman lei a en a, a ling nak; tangte a khoih a, a khu khe nak hi.

³³Ka damsung teng in TOUPA pahtawi in la ka sa ding a: ka hinlai teng in ka Pathian phat in la ka sa ding hi.

³⁴Ka ngaihtuahna amah ading in khumtak hi hen: kei TOUPA ah ka nuam ding hi.

³⁵Mikhialte lei a kipan hihman in om uhenla, migilou saloute om nawn kei uhen! Ka hinna aw, TOUPA phat in! TOUPA phat un!