Read Paite Chin SAM 105 Bible Online

SAM 105 - Paite Chin bible

SAM 105

¹Aw, TOUPA kiang ah kipahthu gen unla, a min lou un; michih lak ah a thilhihte theisak un.

²Amah pahtawi in lasa unla, amah phat in lasa un; a thillamdang hih tengteng thu in houlim un.

³A min siangthou suang un: TOUPA zongte lungtang nuamsa hen.

⁴TOUPA leh a hatna zong unla: a mel zong gige un.

⁵A hihzohsa a nasep lamdangte, a thillamdangte, leh a kam a vaihawmnate theigige un;

⁶A sikha Abraham suante aw, a telte Jakob tate aw.

⁷Amah TOUPA i Pathian ahi a; a vaihawmte leitung ah a om hi.

⁸A thukhun tangtawn in a theigige hi, suan sang khat tan a a thu na piak ngei;

⁹Abraham kiang a a thukhun leh, Isak kiang a a kichiamna ngei;

¹⁰Huai mah thuseh ading in Jakob kiang ah a hihkip a, Israel kiang a tangtawn thukhun ding in.

¹¹Kanaan gam na kiang ah k’on pedia, na goutan tuam di’n chi in.

¹²Mi tawmchik phet a hihlai un; ahi, tawmchik phet, huai gam ah mikhual ahi ngal ua;

¹³Nam tuamtuam kiang ah a pai ua, gam tuamtuam a kipan in mi tuamtuamte kiang ah,

¹⁴Kuamah nuaisiah a phal kei a: ahi, amau ziak in kumpipate a taihilh a:

¹⁵Ka thaunilhte khoih kei unla, ka zawlneite hihna kei un, chi in.

¹⁶Huai gam a tung din kial a sam a; nekding himhim a omsakta kei hi.

¹⁷A ma uah mi a sawl a; Joseph sikha ding a zuak in a om a:

¹⁸A khete kol in a hihna ua; sik khainiang bun in a omta hi.

¹⁹A thu a tun masiah, TOUPA thu in amah a ze-et gige hi.

²⁰Kumpipa’n mi a sawl khia a, a sut a, a khahta a, michih vaihawmpa ngei in.

²¹A insung a heutu ding leh, a sum tengteng tung a vaihawm ding in a bawl a:

²²A mi liante a utut a hen ding leh; a upate hih pil ding in.

²³Israel leng Aigupta gam ah a hoh a; Jakob Ham gam ah a omtadih hi.

²⁴A mite nakpitak in a pungsak a, amau doute sang in a hihhat zawta hi.

²⁵A mite haw ding in a lungtang uh a lehngatsak a, a sikhate tung a lepchiah tak a hih ding in.

²⁶A sikha Mosi a sawl a, a mitel Aron toh.

²⁷Amau a chiamtehnate a lak uah a ensak ua, Ham gam ah thillamdangte a ensak uhi.

²⁸Aman mial a sawl a, a hihmialta a; huchi in a thute a nialta kei uhi.

²⁹A tuite uh sisan a suaksak a, a ngasate uh a hihlumta hi.

³⁰A gam uh Ukeng in a dimta a, kumpipa dantan sung nangawn ah.

³¹Aman thu a gen a, thou tampi hongpai ua, hik leng a gamsung tengteng uah a hongom uhi.

³²A kiang uah vuah sik in gial a pia a, a gam uah meikuang zualzual a peta hi.

³³A grepguite leh a theipi kungte uh a hihsi a; a gam ua singte a kitansakta hi.

³⁴Aman thu a gen a, khaupete a hongpai ua, Lungte toh, sim zoh vuallouh in.

³⁵Huaite’n a gam ua haichi teng a negai ua, a leigahte uleng a gai uhi.

³⁶A gam ua ta masa om tengteng a that a, a hatna tengteng ua gah masapente uh.

³⁷Huchi in, dangka leh dangkaeng toh a pi kheta a; amah namte lak ah mi hatlou khat leng a omkei hi.

³⁸A pawtlai un Aiguptate a kipak ua, amau a lautak ziak un.

³⁹Aman a liah ding in mei a kaisak a, zan a tanvak ding in mei leng a pia hi.

⁴⁰A ngen ua, huchi in vamim a honpia a, van an in amau a taisakta hi.

⁴¹Suangpi a hong a, huchi in tui a hongpawt zuazua a, mun keute ah lui bang in a luangta hi.

⁴²A thu siangthou a theigige a, a sikha Abraham toh.

⁴³Huchi in, a mite nuamsatak in a pikheta a, a mitelte lasa kawmkawm in.

⁴⁴Namchih gamte a kiang uah a pia a: amau michih sepkhiaksa a luahta uhi.

⁴⁵A thusehte a zuih theihna ding un, a dante a kephoihna ding in, TOUPA phat un.