Read Paite Chin SAM 106 Bible Online

SAM 106 - Paite Chin bible

SAM 106

¹TOUPA phat un, Aw, TOUPA kiang ah kipahthu hilh un; amah lah a hoih ngal a: A chitna tangtawn in a om ding hi.

²Kua ahia TOUPA thilhih thupitakte gen thei a, A phatnate theisak vek thei?

³Vaihawmna kem hoihte’n nuam a sa uhi, chiklaipeuh a diktattak a hihmi toh.

⁴TOUPA aw, na mite na deihsakna in hon theigige inla, Aw, na hotdamna toh hongveh in;

⁵Na mitelte hamphatna ka muhtheih a, Na namte kipahna ah ka nawpsak theih a, Na gouluahte toh ka suan theihna ding in.

⁶Ka pipute uh bang in thil ka hihkhial ua, tatsetak ka hi ua, gilou tak in ka om uhi.

⁷Ka pipute un Aigupta gam a Na thillamdang hihte a theisiam kei ua; Na chitna thupitak a theigige ta kei ua; tuipi ah a hel zawta ua, Tuipi San ah.

⁸Huchi pipi in leng amah minziak in amau a hondamta a, a thilhihtheihna thupitak a theihsakna ding in.

⁹Tuipi San a tai a, huchi in a kangta a; huan amau gamdai a pi paisuak bang in tui thukte ah a pi paisuakta hi.

¹⁰Amau homi khut a kipan a hondam a, melma khut a kipan a tanta hi.

¹¹Tuite’n amau doute a khuh khin a, khat leng dam a pawt a omta kei uhi.

¹²Huailai in a thute a gingta ua; a phatna la a sa uhi.

¹³Himahleh a thilhihte a mangngilh zok ua; a lunggelna a ngak ngamta kei uhi;

¹⁴Gamdai ah thil a lunggulh mahmah ua, gamkeu ah Pathian a ze-etta uhi.

¹⁵A thil nget uh a pia a; himahleh a hinna uah gawnna a lutsakta hi.

¹⁶A giahphual uah Mosi a haza ua, TOUPA Mi Siangthou Aron toh.

¹⁷Lei a kam ka a, Dathan a valhta, Abiram pawlte a khuhkhin hi.

¹⁸A pawl lak uah mei hihkuan in a hongom a, meikuang ah migilou saloute a kangmang uhi.

¹⁹Horeb tang ah bawngnou lim a bawl ua, a lim sun a beta uhi.

²⁰Huchibang in a thupina uh bawngtal loupa ne bangphet a suaksakta uhi.

²¹Pathian a hondampa uh, Aigupta gam a thil thupitak hihpa mangngilhta uhi.

²²Ham gam a thillamdangte, Tuipi San dung a thil mulkimhuaite hihte.

²³Huaiziak in, a hihmang kha ding, a chi a, a hehna heimang ding in a mi tel Mosi a lutna ding ah a ma ah na ding kei ngial leh, a hihmang ding chih a gen hi.

²⁴Ahi, gam deihhuaitak a ngaineu ua, a thu a gingta nuam kei ua;

²⁵A puanin uah a phun zaw ua, TOUPA aw a ngaikhe nuam kei uhi.

²⁶Huaiziak in amau lam ah a khut a zak a, amaute gamdai a a hihpukna ding leh,

²⁷A chi suan dingte uh namchih lak a a hihpuk a, gam chin a a hihzakna ding in.

²⁸Baal-peor a zom ua, misi kiang a thillatte a ne samta uhi.

²⁹Huchibang in a thilhihte un amah a su heh ua; a tung uah hi a leng hi.

³⁰Phinehas ading a, vai a hawm a: huchi in hi daihsak in a omta hi.

³¹Huai amah diktatna a seh ahi, tangtawn in suan tengteng tan in.

³²Meribah tuite ah amah a hihheh ua, amau ziak in Mosi tung ah thil hoihlou a tung hial hi.

³³A kha tung ah a hel ua, a muk in kilawmlou pi thu a gen ziak in;

³⁴TOUPA’N a kiang ua hihman thu a piak bang in namte a hihmang kei ua.

³⁵Namchih a kihelpih ua, a thilhihte uh a chingzaw ua;

³⁶A milim nate uh a sem ua; huaite amau ading in thang a hong hita hi:

³⁷Ahi, dawite kiang ah a tapate a tanute un a kithoih ua.

³⁸Sisan gensiatbei, a tapate uleh a tanute uh sisan a suah ua, huaite in Kanaan gam milimte kiang ah a kithoih uhi; huai gam sisan in a na ninta hi.

³⁹Huchi in a nasepte un a hihnin ua, a thilhihte un ang a kawm uhi.

⁴⁰Huaiziak in TOUPA a mite tung ah a thangpaita a, a gouluah a kih hi.

⁴¹Huchi in amau namchih khut ah a pia a; amau hawte’n a tung uah vai a hawm uhi.

⁴²Amau doute’n a nuaisiah ua, a khut uah hihneu in a om uhi.

⁴³Tamveipi amau a humbit a; himahleh a lunggelna uah a hel nak uhi, a gitlouh satlouhna uah hihniam in a omta uhi.

⁴⁴Huchipi in leng aman, a kikou husa uh za in, a mangbatna uh a limsak ahi.

⁴⁵A thukhun amau a theisak gige a, a chitna thupidan bangzel in a lungsim a kisikta hi.

⁴⁶Sal a pi tengteng amau a hehpihsak hi.

⁴⁷TOUPA ka Pathian uh aw, hon hondam inla, namchih lak apan hon pikhawm in, na min siangthou phat ding leh na phatna suang ding in.

⁴⁸TOUPA, Israelte Pathian, phat in om hen, tangtawn a kipan tangtawn pha in leng, Mi tengteng in, Amen, chi uhen, TOUPA phat un.