Read Paite Chin SAM 107 Bible Online

SAM 107 - Paite Chin bible

SAM 107

¹Aw TOUPA kiang ah kipahthu hilh un; amah a hoih ngal a: a chitna tuh tangtawn in a om ding hi.

²TOUPA tatsate’n huai gen uhen, doumi khut a kipan a tatkhiakte’n.

³Gam teng a kipan a pikhawm a, suahlam leh tumlam, simlam leh mallam a kipan in.

⁴Gamdai a gamkeu lampi ah a vakvak ua; Tenna ding khua himhim a mu kei uhi.

⁵Gilkial leh dangtak in a hinna uh a gilsung uah a bahta hi.

⁶Huaitak in a buaina uah TOUPA a sam ua, aman a lungkhamna uah a humbit hi.

⁷Mihing tenna khua a a pai theihna ding un, lampi tangtak ah a pikheta hi.

⁸Aw, mihingte’n TOUPA a chitna ziak leh, mihing tate tung a a thillamdang hihte ziak in phat teitei le u aw!

⁹Aman a hinna un a lunggulh mahmah in a taisak a, hinna gilkial a vahsak hi.

¹⁰Mial nuai ah leh sihna lim a tu a, gimthuakna leh sikkhau a hente mahmah;

¹¹Pathian thute tung ah a hel ua, Tungnungpen lunggel a ngaihneu ziak un:

¹²Aman a lungtang uh sepgimna in a minsakta a; a puk ua, panpihpa ding himhim a om ngal kei a.

¹³A buaina uah TOUPA a sam ua, aman a buaina ua kipan a pikhia a, a mangbatna ua pan a hondam hi.

¹⁴Mial nuai a kipan leh sihna lim a kipan a pi khia a, a henna uh a suktat sakta hi.

¹⁵Aw, mihingte’n TOUPA a chitna ziak in leh, mihing tate tung a a thillamdang hihte ziak in phat teitei le u aw!

¹⁶Aman dal kongkhakte a chimsak a, a kalhna sik tawnte a hihtanta ngal a.

¹⁷Mihaite a tatlekna ziak un leh, a gitlouh satlouhnate u ziak in a kihihgim uhi.

¹⁸A hinna un nektheih chiteng a kih a; sihna kulh kongkhakte a naih uhi.

¹⁹Huaitak in a buaina uah TOUPA a sam ua, aman a mangbatna ua kipan in a hondam zel hi.

²⁰A thu a sawl khia a, amau a damsak hi, a manthatna ua kipan in a humbit hi.

²¹Aw, mihingte’n TOUPA a chit ziak leh, mihing tate tung a a thillamdang hihte ziak in phat teitei le uh aw!

²²Amau kipahthugen kithoihnate lan uhenla, a thilhihte uh lasa in hilh uhen.

²³Tuipi a long lian a paisuk a, tuiza tak tung a nasemte’n:

²⁴Huaite’n TOUPA thilhihte leh tui thupi a a thillamdang hihte a mu uhi.

²⁵Aman thu a pia a, huihpi a nungsak a, huai in a tuikihotte a sangsak hi.

²⁶Vanlam ah septouh in a om ua, tui thukpi ah a tumsuk nawn zel uhi: mangbatna ziak in a hinna uh a zulbei hi.

²⁷Zukham bang in a sawi hoihoi ua, a tuan loklok ua, omdan ding hunlel a theikei nak uhi.

²⁸Huan a buaina uah TOUPA a sam ua, aman a mangbatna ua kipan in a pi hi.

²⁹Huihpi a daisak duam a, huchi in a tuikihotte a dai uhi.

³⁰Huan, a daihtak ziak in a kipak ua; huchi in aman a omna ding uh longkhawlna ah a pitung hi.

³¹Aw, mihingte’n TOUPA a chit ziak leh, mihing tate tung a a thillamdang hihte ziak in phat mahmah le uh aw!

³²Amau mite kikhopna ah amah phat uhenla, upate tutna ah phat uhen.

³³Aman luipite gamdai a suaksak a, tuinakte leng leikeu a suaksak hi.

³⁴Gam hoih gam a suaksak zel, a sung a omte genhak ziak in.

³⁵Gamdai dilmun a suaksak zel a, gamkeu leng tuinak a suaksak hi.

³⁶Huai ah gilkialte a omsak a, tenna ding khua a bawl uhi.

³⁷Loute a nei ua, grephuante a bawl ua, a gah hongpungte a muh theihna ding un.

³⁸Amau vual a zawl a, nakpitak a hihpun in a om ua; a gante uh kiam a phal kei hi.

³⁹Huan, nuaisiah, gimthuakna, lungkhamna ziak in a kiam hiaihiai ua, a kun ngiungiau lel uhi.

⁴⁰Aman miliante tung ah muhsitna a sungbua a, gamdai, lampi omlouhna ah a vakvai saksak hi.

⁴¹Himahleh gentheite gimthuakna a kipan in mun sang ah a khatou hi, ganhon bang in inkuanpihte a siamsak hi.

⁴²Mi diktatte’n huai a mu in a kipak ding uh; thulimlouhna tengteng in a kam a hum ding hi.

⁴³Kuapeuh a pil in huaite a kem hoih ding ua, TOUPA chitnate a ngaihtuah ding uhi.