Read Paite Chin SAM 108 Bible Online

SAM 108 - Paite Chin bible

SAM 108

¹Pathian aw, ka lungtang a kip hi; la a sa ding, ahi, phatna la ka sa ding, ka thupina ngei in.

²Pekging leh kaihgingte aw, halh un: kei zaw zingkhang in ka halh ding.

³TOUPA aw, michih lakte ah kipahthu k’on hilh ding: namchih lak ah nangmah phat in la ka sa ding hi.

⁴Na chitna van khup in a thupi a, na thutak in vandumte a sun hial hi.

⁵Pathian aw, nang van khen ah pahtawi in hongom in: na thupinate leitung tengteng tung ah pahtawi in om hen.

⁶Na deihtakte humbit a a om theihna ding un, na khut taklam in hondam inla, hon dawng in.

⁷Pathian in a sianthouna ah hiai bang in a gen a, Nuam ka sa ding a: Sekem khua ka hawm ding a, Sukkoth guam ka hawmzak ding.

⁸Gilead gam kei a ahi a; Manasseh gam leng ka lu humbitna ahi a: Judah gam ka lalchiang ahi.

⁹Moab gam ka kisilna bel ahi a; Edom gam ah ka khedap ka pai ding a; Philistia gam ka kikou khum ding hi.

¹⁰Khopi kulhnei ah kuan a honpi lut dia? Edom gam ah kuan a honpi dia?

¹¹Pathian aw, nang hon khahkhia hilou na hi maw? Pathian aw, ka sepaih honte uh kiang ah lah na pawt samta ngal kei a.

¹²Galte sual ding in hon panpih in; mihing panpihna zaw bangmahlou phet ahi.

¹³Pathian ziak in hangtak in ka hih ding uh: Amah lah hondoute sikdenpa ding ahi ngal a.