Read Paite Chin SAM 109 Bible Online

SAM 109 - Paite Chin bible

SAM 109

¹Ka phat Pathian aw, dai nilouh ken:

²Migilou salou kam leh kam khemhat ka tung ah a hangsan ngal ua: amau lei zuauthei in ka kiang ah thu a gen uhi.

³Huatna thu in hon umsuak ua, bangmahlou in a hondou uhi.

⁴Ka it ziak in a hondoute a hong hita uhi: himahleh kei zaw thumthum ding in ka kipe chinten hi.

⁵Amau thil hoih thil gilou in honthuk ua, ka itna huatna mah in a honthuk uhi.

⁶Nang a tung ah migilou koih inla: a taklam ah hekmi ding hen.

⁷Vaihawmsak a a om chiang in siamlouh tang in pawt henla: a thumna khelhna ah suak hen.

⁸A damsung nite tom henla; a heutu hihna midang in tang hen.

⁹A tate pa lou in om uhenla, a zi mah leng meithai in om hen.

¹⁰A tate mi vakvai honghi in, khutdoh uhenla; a nekding uh a mun gamsiate ah zong uhen.

¹¹A pung delh a dangka leitawisak in a neih tengteng laksak vek henla; mikhualte’n a sepgim gah lok uhen.

¹²A tung a chitna langsak zel ding kuamah omsam kei uhenla; a ta paneiloute hehpihpa ding kuamah omkei hen.

¹³A suante hihman in om uhen la; khangthak hongom nawn ah a min uh nul mang in om hen.

¹⁴A pipute uh gitlouh satlouhna TOUPA kiang ah theihgige in om henla: a nu khelhna nulmang in omkei hen.

¹⁵TOUPA ma ah om gige hen. Aman amau theihgigena lei a kipan a hihmang theihna ding in.

¹⁶Chitna latsak nadan a theihlouh ua, mi genthei, tagah leh khasiate thah tum a a sawi zawk ziak un:

¹⁷Ahi, mi hamsiat a utlam ahi a, huchi in amah tung ah a hongtung a: mi vualzawl a kipahlam ahi kei a, huchi in amah gamlat in a om hi.

¹⁸Puanaktual silh bang in hamsiatna in a kivan a, huai a gilsung ah tui bang in a lut a, a guh ah thau bang in a leng lut hi.

¹⁹Huai amah ading in silh gige puansilh bang in om henla, a kigak zelna kawnggak mah leng hi hen.

²⁰Huai hondoute leh ka hinna gensete TOUPA’N a thukna ahi.

²¹Himahleh, TOUPA Pathian aw, nang na min ziak in hon hehpih inla: na chitna a hoih ziak in hon humbit in.

²²Genthei leh tagah tak ka hi a, ka lungtang ka gilsung ah liam in a om ngal hi.

²³Lim kiamlam bang in ka mang a: khaupe bang in mutleng in ka om hi.

²⁴Ka khukte an ngawl ziak in a hatta kei a; ka sa in thau himhim a puta kei hi.

²⁵Amau gensiat ka na hita a; honmuh un a lu uh a sing uhi.

²⁶TOUPA ka Pathian aw, hon panpih inla; aw na chitna bangzel in hon hondam in;

²⁷Huai na khut ahi, a chih theih ua, TOUPA, nang na hih ahi, chih a theihna ding un.

²⁸Amau hamsiat uhen, nang zaw vualzawl zaw in: a thoh tak un a zahlak ding ua, na sikha bel a nuamsa ding hi.

²⁹Hondoute zumna puan silhsak in om uhenla, puanak a kivan bang in amau zahlakna in kivan uhen.

³⁰Ka kam in TOUPA kiang ah kipahthu nakpi’n ka gen dia; ahi, mipi lak ah amah ka phat ding hi.

³¹Amah tagahte taklam ah ading a, a hinna vaihawmsakte lak a hondam ding in.