Read Paite Chin SAM 111 Bible Online

SAM 111 - Paite Chin bible

SAM 111

¹TOUPA phat un. Mi diktatte kikhop khawmna ah leh kikhopna ah, Ka lungtang tengteng in TOUPA kiang ah kipahthu ka hilh ding hi.

²TOUPA thilhihte a thupi a, a tung a kipak peuhte’n zonkhiak ahi nak hi.

³A nasep a zahtakhuai in a thupi a; a diktatna tangtawn a om ding ahi.

⁴Aman a thillamdang hihte a theigige a: TOUPA mi hehpihthei tak, chitna a dim ahi.

⁵Amah laute kiang ah nekding a pia a; a thukhun tangtawn in a theigige ding.

⁶A thilhihtheihdan a mite kiang ah a langsak a, namchih gouluah ding a kiang ua pia in.

⁷A khut thilhihte thutak leh vaihawmna dik ahi a: a thuzohna thute muanhuai hi.

⁸Huaite tangtawn tangtawn a ding in hihkip in a om a, thutak leh diktat a hih ahi chiat hi.

⁹Aman a mite kiang ah tatna a sawl a; a thukhun tangtawn a ding in a sep a; a min a siangthou in a zahtakhuai hi.

¹⁰TOUPA kihtak pilna bul ahi a; huchibang a hihmite’n theihsiamna hoih a nei uhi; amah phatna tangtawn a om ding ahi.