Read Paite Chin SAM 114 Bible Online

SAM 114 - Paite Chin bible

SAM 114

¹Israelte Aigupta gam a pan a pawt ua, Jakob inkuanpihte melmak mi lak a kipan a pawt lai un.

²Judah a Mun Siangthou a hi a, Israelte a vaihawmna gam a hong hita hi.

³Tuipi in huai a mu a, a taimang a; Jordan lui kiksak in a omta hi.

⁴Tang liante belamtal bang in a diang ua, mual neute belampa noute bang in.

⁵Aw nang tuipi, bang na chi a, na taimang tak? Nang Jordan, bangchi na hia, na kiknawn tak?

⁶Nou tang liante aw, bang na chi ua ahia, belampa noute bang a na dian uh?

⁷Nang leitung, TOUPA ma ah ling in, Jakobte Pathian ma ah:

⁸Aman suangpi dil a suaksak a, meisuang tuinak a suaksak hi.