Read Paite Chin SAM 115 Bible Online

SAM 115 - Paite Chin bible

SAM 115

¹TOUPA aw, kou hon pelou in, Koumau hon pelou in, na min thupina pe zaw in, na chitna leh na thutak ziak in.

²Bang achia namchih in, a Pathian uh koi a om ahia? chi uh ahia?

³Ka Pathian uh van ah a om a: A utut a hih ahi.

⁴A milimte uh dangka leh dangkaeng ahi ua, mihing khutsuak ahi uhi.

⁵Kam nei napi, a pau theikei ua; mit a nei ua, a mu theikei ua:

⁶Bil a nei ua, a za theikei ua: nak a nei ua, gim a za theikei ua;

⁷Khut a nei ua, bangmah a khoih theikei ua; khe a nei ua, a pai theikei ua; a dang un a pau thei sam kei uhi.

⁸Amau bawlte amaute bang a hi ding ua; ahi, huai muang peuhmahte.

⁹Israelte aw, TOUPA muang un: amah amau panpihpa leh a phaw uh ahi.

¹⁰Aron inkuanpihte aw, TOUPA muang un: amau panpihpa leh a phaw uh amah ahi.

¹¹TOUPA laute aw, TOUPA muang un: amau panpihpa leh a phaw uh ahi.

¹²TOUPA’N hon theigige a; a vualzawl ding: Israel inkuante a vualzawl ding a: Aron inkuante a vualzawl ding hi.

¹³TOUPA laute a vualzawl ding, a lian a neu in.

¹⁴TOUPA’N nou hon pungsak hen, nou leh na tate uh toh.

¹⁵TOUPA vualzawlna mute na hi uh, amah lei leh van siampa ahi.

¹⁶Vante TOUPA vante ahi a; leitung mihing tate kiang ah a pia hi.

¹⁷Misite’n TOUPA a phat kei ua, mun daitak a paisukte peuhmah in a phat sam kei uh;

¹⁸Kou bel TOUPA ka phat ding uh, tu a kipan a tangtawn in, TOUPA phat un.