Read Paite Chin SAM 116 Bible Online

SAM 116 - Paite Chin bible

SAM 116

¹TOUPA ka it ahi, ka aw leh ka ngetnate a ngaihkhiak ziak in.

²Kei lam a a bil a hondoh ziak in ka damsung teng in amah ka sam ding hi.

³Sihna khauhualte’n honvial a, Sheol natnate’n hon man a: mangbatna leh lungkhamna ka na tuak hi.

⁴Huaitak in TOUPA min in ka sam a: Aw TOUPA, hehpih in ka hinna humbit in, chi in.

⁵TOUPA mi hehpihthei tak leh diktattak ahi a; ahi, i Pathian uh mi lainatthei tak ahi.

⁶TOUPA’N mi mawlte a humbit nak a: hihniam in ka om a, aman hon hondamta hi.

⁷Ka hinna aw, na khawlna ah kiknawnta in; TOUPA’N na tung ah hoihtak in a hihta ngal a.

⁸Ka hinna sihna apan, ka mitte khitui apan, ka khete pukna apan na humbitta hi.

⁹Mihing gam ah TOUPA ma ah ka vak ding hi.

¹⁰Ka gingta a, thu ka gen ding, ahi, nakpitak a hihgim in ka om hi.

¹¹Ka lungvai in, mi tengteng zuau ahi uh, ka na chita mawk hi.

¹²Ka tung a a thil hoih hih tengteng ziak in TOUPA kiang ah bang ahia ka piak thuk sam ding?

¹³Hotdamna nou ka la ding a, TOUPA min ka sam ding hi.

¹⁴Ka thuchiamte TOUPA kiang ah ka tangtun ding, ahi a mite ma ah.

¹⁵A misiangthoute sihna TOUPA muh in manpha pi ahi.

¹⁶TOUPA aw, na sikha ka hi: na sikha, na sikhanu tapa ka hi; n’on henna na sutta hi.

¹⁷Kipahthugenna kithoihnate k’on lan ding a, TOUPA min ka sam ding hi.

¹⁸Ka thuchiamte TOUPA kiang ah ka tangtun ding, ahi, a mite tengteng ma ah;

¹⁹TOUPA biakin huangsung intual ah, Jerusalem aw, na laitak ah ka tangtun ding hi. TOUPA phat un.