Read Paite Chin SAM 119 Bible Online

SAM 119 - Paite Chin bible

SAM 119

¹Lampi a mi hoihkimte’n nuam a sa uhi, TOUPA dan zuite’n.

²A thu theihsakte zuite’n nuam a sa uhi, lungtang tengteng a amah zongte’n.

³Ahi, amau diktatlouhna a hih kei ua: A lampite ah a pai zel uhi.

⁴Nang na thuzohna thute phatuamngai tak a, zui ding in thu n’on pia hi.

⁵Aw, na thusehte zui ding in ka omdante hihkip in om leh aw;

⁶Huai hun chiang in ka zahlak kei ding a, na thupiakte khawk ka sak hun chiang in.

⁷Lungtang diktak pu in kipahthu k’on hilh ding hi. Na vaihawmna dikte kazil hun chiang in.

⁸Na thuseh ka zui ding a: aw, hon paisan den ken.

⁹Valnou in, bangchi’n ahia a omdan a hih siangthou ding? Na thu bangzel a a omdan venghoih in.

¹⁰Ka lungtang tengteng in k’on zong a; Aw, na thupiakte ka paisan zaw phal mahmah ken.

¹¹Na tung a thil ka hihkhelh louhna ding in na thu tuh ka lungtang ah ka kem hi.

¹²TOUPA aw, nang nuam nasa hi; na thusehte hon zilsak in.

¹³Na kam a na vaihawm pawt tengteng ka muk in ka theisakta hi.

¹⁴Na thu theihsak lam ah nuam ka sa a, hauhsaknate teng a nuam ka sak bang in.

¹⁵Na thuzohna thute ka ngaihtuah ding a, na lampite ka limsak behlap ding hi.

¹⁶Na thuseh tungte ah ka kipak ding a: na thu ka mangngilh kei ding hi.

¹⁷Ka hin theihna ding in na sikha tung ah hoihtak in hih in; huchi in na thu ka zui ding hi.

¹⁸Na danthu a kipan thillamdang ka muh theihna ding in, ka mitte vaksak in.

¹⁹Lei ah mikhual ka hi a; na thupiakte ka lak ah im ken.

²⁰Ka hinna kitam gawp in a om a, chiklaipeuh a na vaihawmna a ngai hi.

²¹Mi kisathei, hamsiat a omte na taihilh a, na thupiakte vakmangsante.

²²Gensiatna leh muhsitna ka kiang a kipan lamang in; na thu theihsakte ka zui hi.

²³Mi liante leng a tu ua, hon kalh ua; himahleh na sikha in na thusehte a ngaihtuah zaw ahi.

²⁴Na thu theihsakte ka kipahna ahi a, thupha hon hilhte ahi uh.

²⁵Ka hinna leivui ah a belh bikbek a; na thu bangzel in hon hihhalh in.

²⁶Ka omdante ka hon theisak a, nang n’on dawng a: na thusehte hon sinsak in.

²⁷Na thuzohna lam hon theisiam sak in: huchi in na thillamdang hih thute ka ngaihtuah ding hi.

²⁸Ka hinna lungkham ziak in a tuimang nak a: na thu bangzel in hon hihhat in.

²⁹Omdan diklou ka kiang a kipan lasuan inla; na dan hehpih in honpia in.

³⁰Omdan muanhuai ka tel a; na vaihawmnate ka ma ah ka omsak hi.

³¹Na thu theihsakte ah ka bel chinten a; TOUPA aw, hon zahlak sak ken.

³²Na thupiak lam ah ka tai ding a, ka lungtang na hihlet hun chiang in.

³³TOUPA aw, na thuseh lampi hon ensak in; huchi in a tawppha in ka tawn ding hi.

³⁴Theihsiamna honpia in, huchi in, na dan ka kem hoih ding hi, ahi ka lungtang tengteng in ka zui ding hi.

³⁵Na thupiak lampi ah hon paisak in, huai ah ka kipak ngal a.

³⁶Na thu theihsak lam ah ka lungtang kiheisak in, huaihamna lam ah hilou in.

³⁷Thil bangmahlou phet enlou ding in ka mit kaihei inla, na lampite ah hon hihhalh in.

³⁸Na thu na sikha kiang ah hihkip in, huai nangmah launa ahi.

³⁹Kei adia gensiatna ka kihtak lamang in; na vaihawmte lah a hoih ngal a.

⁴⁰Ngai in, na thuzohna thute theih ka ut gige a: na diktatna ziak in hon hihhalh in.

⁴¹TOUPA aw, na chitnate ka kiang ah hongpai hen, na hotdamna ngei, na thu bangzel in.

⁴²Huchi in, hon gensete dawnna ding ka nei ding a, na thu lah ka muang ngal a.

⁴³Huan, thutak thu ka kam a kipan lakhe vek kenla; na vaihawmnate ka lamen gige ngal a.

⁴⁴Huchi in na dan ka zui gige ding a, tangtawn tangtawn in.

⁴⁵Huan, noplenna ah ka vak ding a; na thuzohna thute ka zong hi.

⁴⁶Na thu theihsak thute kumpipate ma ah ka gen ding a, ka zum kei ding hi.

⁴⁷Huan, ka it na thupiak ah ka kipak ding hi.

⁴⁸Na thupiak, ka it lamte ah, ka khutte ka zak ding a, na thusehte ka ngaihtuah ding hi.

⁴⁹Na sikha kiang a thuchiam theigige in, Nang n’on lamet sak ziak in.

⁵⁰Huai ka gimthuakna ah leng ka khamuanna ahi: na thu in lah a hon hihhalhta ngal a.

⁵¹Kisatheite’n nakpitak in hon nuihsan ua: himahleh na dan ka pai hoisan kei hi.

⁵²TOUPA aw, nidanglai a na vaihawmte ka theigige a, ka kikhamuan zel hi.

⁵³Lunghihlouhna in nakpitak in hon buakkhumta a, migilou salou na dan paisante ziak in.

⁵⁴Ka khualzinna in ah na thusehte ka la ahi gige hi.

⁵⁵TOUPA aw, zanchiang in na min ka theigige hi, na dan leng ka zui gige hi.

⁵⁶Huai ka nei a, na thuzohna thute ka vom hoih ziak in.

⁵⁷TOUPA ka tantuan ahi a: na thu ka zui ding chih ka gen khinta hi.

⁵⁸Ka lungtang tengteng in na hehpihna ka ngen a: na thu bangzel in hon hehpih in.

⁵⁹Ka omdante ka ngaihtuah a, na thu theihsak lam ah ka kalsuan hi.

⁶⁰Ka kintat a, na thupiakte zui ding in ka zekai kei hi;

⁶¹Migilou salou khauhual in hon gaklom gige a; himahleh na dan ka mangngilh kei hi.

⁶²Zankim in kipahthu gen din ka thou ding a, na vaihawm diktatte ziak in.

⁶³Nangmah laute leh na thuzohna thu zuite lawm ka hi.

⁶⁴TOUPA aw, leitung na chitna in a dim ahi: na thusehte honhilh in.

⁶⁵TOUPA aw, na thu bang in na sikha na hihhoih zel hi.

⁶⁶Ngaihtuah siamna leh theihna hon sinsak in; na thupiakte ka gingta hi.

⁶⁷Hihhaksat a ka om ma in ka vakmang a: tunzaw na thu ka zuita hi.

⁶⁸Nang na hoih a, thil hoih leng na hih a: na thusehte hon sinsak in.

⁶⁹Kisatheite’n ka tung ah zuau a phuaktawm ua: ka lungtang tengteng in na thuzohna thute ka vom hoih ding hi.

⁷⁰A lungtang uh sungthau bang in a thau a; Kei bel na dan tung ah ka kipak gige hi.

⁷¹Na thusehte ka zil theihna ding a hihhaksat a ka om a hoih hi.

⁷²Dangkaeng leh dangka sang tampi sang in na kam a dan pawt kei a ding in a hoihzaw hi.

⁷³Na khut in hon siam in, a honsek hi: na thupiakte ka sin theihna ding in theihsiamna honpia in.

⁷⁴Nangmah laute’n hon mu ding ua, a kipak ding uh; na thu ka lamet ziak in.

⁷⁵TOUPA aw, na vaihawmte a dik chih leh, nang ginom tak in ahi, n’on hihgim chih ka thei hi.

⁷⁶Na sikha kiang a na thuchiam bangzel in hehpih in na chitna ka khamuanna hisak in.

⁷⁷Ka hin theihna ding in na chitnate ka kiang ah hongpai hen: na dan ka kipahna ahi.

⁷⁸Kisathei zahlak in om uhen; dikloupi in hon hihniamta ua: himahleh na thuzohna thute ka ngaihtuah ding hi.

⁷⁹Nang hon laute keilam hong nga uhen, na thu theihsakte a thei ding uhi.

⁸⁰Ka zahlak louhna ding in ka lungtang na thusehte ah hoihkim in om hen.

⁸¹Ka hinna na hotdamna ngai in a bah a: himahleh na thu ka lamen gige hi.

⁸²Na thu etna in ka mit a vai khinta a, nang chikchiang a hon khamuan ding na hia? ka chi, ka chi a.

⁸³Meikhu uk savun thawl bang ka na hita ngal a; himahleh na thusehte ka mangngilh kei hi.

⁸⁴Na sikha kum chiang ding bang tan hi ding ahia, hon simmohte tung ah chikchiang in ahia vai na hawm ding?

⁸⁵Mi kisathei, na dan bang a om loute’n ka kiakna ding in kawkhukte a tou uhi.

⁸⁶Na thupiak tengteng a ginom ahi: amau dikloupi in hon simmawh uh; hon panpih in.

⁸⁷Amau lei ah hon hihmang dekdek ua; himahleh na thuzohna thute lah ka kiheisan ngal kei hi.

⁸⁸Na chitna bangzel in hon hihhalh in: huchi in, na kam a thu theihsak ka zui ding hi.

⁸⁹TOUPA aw, tangtawn a ding in na thu van ah kiptak in a om hi.

⁹⁰Na ginomna suan tengteng pha in a om ding hi: leitung na hihkip a, a om gige hi.

⁹¹Huaite tuni’n na vaihawmte bang in a om gige a thil teng na sikhate ahi uhi.

⁹²Na dan ka kipahna hi kei lezaw, ka gimthuakna a mangthang ding hi’ng a.

⁹³Na thuzohna thute chiklaipeuh in leng ka mangngilh kei ding: nang lah huaite in n’on hihhalh ta ngal a.

⁹⁴Nang a ka hi, hon hondam in; na thuzohna thute ka zong a.

⁹⁵Migilou saloute’n hihmang tum in a hon ngak ua; himahleh na thu theihsakte ka ngaihtuah ding hi.

⁹⁶Hoihkimna teng tawpna ka mu a; na thupiak a za ngei e.

⁹⁷Aw, na dan deih hi natel ing e! Nitum a ka ngaihtuah ahi.

⁹⁸Na thupiakte’n hondoute sang a pilzaw in honbawl a; tangtawn a ka kiang a a om gige ziak in.

⁹⁹Honhilhte tengteng sang in pilna ka nei zaw ahi; na thu theihsakte ka ngaihtuah a hih nak ziak in.

¹⁰⁰Tekte sang in ka theisiam zaw a, ahi, na thuzohna thute ka vom hoih ziak in.

¹⁰¹Na thu ka zuih theihna ding in lampi gilou himhim ah ka khete a kalsuan ka phal kei hi.

¹⁰²Na vaihawmna apan ka pial kei; nang n’on hilh ziak in.

¹⁰³Na thute ka kam a ding in khum hina tel e! ahi, ka kam a ding in khuaizu sang in a khum zaw hi.

¹⁰⁴Na thuzohna thute ziak in theihsiamna ka nei zel: huaiziak in omdan diklou peuhmah ka hua hi.

¹⁰⁵Na thu ka khe ading in khawnvak ahi a, ka lampi ading in vak ahi.

¹⁰⁶Na vaihawmna diktatte zui ding in ka kichiam a, ka hihkip lai hi.

¹⁰⁷Nakpitak a hihhaksat in ka om a; TOUPA aw, na thu bangzel in hon hihhalh in.

¹⁰⁸TOUPA aw, hehpih in ka kam deihthu a thilpiakte na sang inla, na vaihawmnate hon sinsak in.

¹⁰⁹Ka hinna ka khut ah a om a; himahleh, na dan ka mangngilh ngeikei hi.

¹¹⁰Migilousaloute’n ka awkna ding in thang a kam ua; himahleh na thuzohna thute ka vakmang san kei hi.

¹¹¹Na thu theihsakte tangtawn a gouluah din ka la a; ka lungtang hihnuam pen ahi.

¹¹²Na thusehte, a tawppha a zui ding a, ka lungtang ka koihkipta hi.

¹¹³Bangmahlou ngaihtuahnate ka hua a: Na dan ka deih ahi.

¹¹⁴Nang ka bukna mun leh ka phaw na hi a; na thu ka lamet ahi.

¹¹⁵Nou thil hoihlou hihte aw, hon paisan un; ka Pathian thilpiakte ka vom hoih theihna ding in.

¹¹⁶Ka hin theihna ding in na thu bangzel in honlen nilouh inla, ka lamet tung ah zahlak in hon omsak ken.

¹¹⁷Honkai in, huchi in ka bit ding a, na thusehte ka khawksa gige ding ahi.

¹¹⁸Na thusehte vakmang san tengteng na musit a; a khemna ulah zuau ahi.

¹¹⁹Lei a migilou salou tengteng eksia bang in na hihmang a: huaiziak in na thu theihsakte ka deih hi.

¹²⁰Ka sa nangmah lau in a ling a: na vaihawmnate leng ka lau hi.

¹²¹Vai ka hawm a, diktattak in ka hih hi: hon nuaisiahte lak ah hon nuse ken.

¹²²Na sikha tungtang thu ah, a hoihna a bultum in: kisatheite’n hon nuaisiah kei uhen.

¹²³Na hotdamna etna in ka mit a vaikhinta a, na thu diktat tak etna toh in.

¹²⁴Na chitna bangzel in na sikha tung ah hih inla, na thusehte honhilh in.

¹²⁵Na sikha ka hi a, theihsiamna honpia in; na thu theihsakte ka theihna ding in.

¹²⁶TOUPA, sep a hunta; na dan bangmahlou in a bawlta uhi.

¹²⁷Huaiziak in na thupiakte dangkaeng sang in ka deih a; ahi, dangkaeng siangthou sang in.

¹²⁸Huaiziak in thil peuhmah thu a na thuzohna thu tengteng dik in ka thei a; omdan diklou peuhmah ka hua ahi.

¹²⁹Na thu theihsakte a lamdang a: huaiziak in ka hinna in a a zui hi.

¹³⁰Na thu hilhchet in mite a hihvak a: mi mawlte a theisiam sak hi.

¹³¹Kam zapi in ka ka a, ka nak hawphawp a: na thupiakte ka lunggulh ziak in.

¹³²Kei lam hong nga inla, hon hehpih in, na min deihte na hehpih bang in.

¹³³Ka khe kalsuante na thu ah hihkip inla; gitlouhnate ka tung ah thu neisak ken.

¹³⁴Mihing nuaisiahna pan hon humbit in; huchi in na thuzohna thute ka zui ding hi.

¹³⁵Na mel in na sikha sunvak inla; na thusehte hon sinsak in.

¹³⁶Na dan a zuihlouh ziakin, Ka khitui Lui tui bang in ka mit ah a luang khia hi.

¹³⁷TOUPA aw, nang na dik a, na vaihawmte a dik ahi.

¹³⁸Na thu theihsakte diktat leh ginom mahmah in thu na pia a.

¹³⁹Ka phattuamngaihna in hon negaita, hondoute’n na thu a mangngilh ziak un.

¹⁴⁰Na thu siangthou mahmah ahi; huaiziak in na sikha in a deih hi.

¹⁴¹Mi neu leh mi muhsit ka hi a: himahleh na thuzohna thute ka mangngilh ngeikei hi.

¹⁴²Na diktatna tangtawn diktatna ding ahi a, na dan leng thutak ahi.

¹⁴³Mangbatna leh lunglauna in hon buakkhumta a; himahleh na thupiakte ka kipahna ahi.

¹⁴⁴Na thu theihsakte tangtawn a ding in a dik ahi: theihsiamna honpia in, huchi in, ka hing gige ding hi.

¹⁴⁵Ka lungtang tengteng in k’on sam a; TOUPA aw, hon dawng in: na thusehte ka kem hoih ding hi.

¹⁴⁶K’on sam zel a; hon dawng in, huchi in na thu theihsakte ka zui ding hi.

¹⁴⁷Phalvak ma in ka thou a, huhna deih in ka kikou a; na thute ka lamen hi.

¹⁴⁸Na thu ka ngaihtuah theihna ding in zanvente ma in, ka mitte a hak uhi.

¹⁴⁹Na chitna bangzel in ka aw ngaikhia inla; TOUPA aw, na vaihawmnate bangzel in hon hihhalh in.

¹⁵⁰Ngaihtuah gilou delhte’n a honnaih ua: amau zaw na dan gamlat a om ahi uh.

¹⁵¹TOUPA aw, nang zaw na nai a; na thupiak tengteng thutak ahi.

¹⁵²Nidanglai in, na thu theihsakte a kipan in, huaite tangtawn a ding in na hihkip chih ka na theita hi.

¹⁵³Ka haksatna ngaihtuah inla, hon humbit in; na dan lah ka mangngilh ngei ngal kei a;

¹⁵⁴Ka thu hon genpih inla, hontan in na thu bangzel in hon hihhalh in.

¹⁵⁵Hotdamna migilou saloute apan a gamla hi, na thusehte a zuihlouh ziak un.

¹⁵⁶TOUPA aw, na chitnate a thupi hi; na vaihawmnate bangzel in hon hihhalh in.

¹⁵⁷Hon simmohte leh hondoute tampi ahi ua, himahleh na thu theihsakte ka paikawi san kei hi.

¹⁵⁸Lepchiahtak a hihte ka en a, ka lungkim kei hi; na thu a zuih louh ziak un.

¹⁵⁹Na thuzohna thute ka deihdan ngaihtuah inla, TOUPA aw, na chitna bang in hon hihhalh in.

¹⁶⁰Na thu a tung a pan in a dik a, na vaihawmna diktat chiteng tangtawn in a om nilouh hi.

¹⁶¹Mi liante’n a ziak omlou in hon simmawh ua: himahleh ka lungtang in na thute ahi, a kihtak.

¹⁶²Na thu ah nuam ka sa a, thil thupipi gallak a mu bang in.

¹⁶³Zuauthu ka hua in ka kih a; na dan bel ka deih ahi.

¹⁶⁴Ni khat in sagihvei nang ka hon phat a, na vaihawm diktatte ziak in.

¹⁶⁵Na dan deihte’n khamuanna thupitak a nei ua; pukna himhim a neikei uhi.

¹⁶⁶TOUPA aw, na hotdamna ka lamen a, na thupiakte bang in ka hih zel hi.

¹⁶⁷Ka hinna in na thu theihsakte a zui gige a: ka deih mahmah hi.

¹⁶⁸Na thuzohna thute leh na thu theihsakte ka zui zel a; ka omdan tengteng na ma ah a om hi.

¹⁶⁹TOUPA aw, k’on sap husa na ma ah hongnai hen: na thu bangbang in theihsiamna honpia in.

¹⁷⁰Hehpih ka ngetna na ma ah tung hen: na thu bang in hon humbit in.

¹⁷¹Na thusehte n’on sinsak chiang in, Ka muk in nang phatna thu gen hen:

¹⁷²Ka lei in na thu a gen ding a, na thupiak tengteng diktatna a hih ziak in.

¹⁷³Na khut in hon panpih in, na thuzohna thute ka tel ngal a.

¹⁷⁴TOUPA aw, na hotdamna ka lunggulh nak a; na dan ka kipahna ahi.

¹⁷⁵Ka hinna hing hen, huchi in a honphat ding hi; na vaihawmnate’n leng hon panpih hen.

¹⁷⁶Belam mang bang in ka vak mang a na sikha zong in; na thupiakte lah ka mangngilh ngei ngal kei hi.