Read Paite Chin SAM 132 Bible Online

SAM 132 - Paite Chin bible

SAM 132

¹TOUPA, David a haksat thuakna tengteng theihpih in;

²TOUPA kiang a kichiam a, Jakob Mi Hatpa kiang a thu a chiamdan;

³Ka omna inn a biakbuk ah ka lut kei dia, ka lupna ah ka kah sam kei ding hi;

⁴Ka mitte ihmut ka phal kei ding a, ka mitte a sin uh leng ka phal sam kei ding;

⁵TOUPA mun ding ka zonkhiak masiah, Jakob Mi Hatpa omna ding chi in.

⁶Ngai in, a thu Ephrathah ah ka za ua; sing gam ah ka muta uhi.

⁷Amah biakbuk ah ka lut ding ua; a khe ngakna bul ah ka be ding uhi.

⁸TOUPA aw, thou inla, na khawlmun ding ah lut in; nang leh na hatna bawm.

⁹Na siampute diktatna in kivan uhenla; na misiangthoute nuamsa in kikou uhen.

¹⁰Na sikha David ziak in na thaunilh mel kiheisak nawn ken.

¹¹TOUPA’N David kiang ah thutak in a kichiamta a; a lehngatsan kei ding hi: na sapum gah a mi mangtutphah ah ka tusak ding.

¹²Na tate’n ka thukhun leh ka thu theihsak, amau ka hilh ding a zuih uleh, a tate u leng tangtawn in na mangtutphah ah a tu zel ding uh, chi in.

¹³TOUPA’N Zion lah a tel ngal a; a omna ding in a deih hi.

¹⁴Hiai tangtawn a ding a ka khawlmun ding ahi: hiai ah ka om nilouh ding; ka deihlam ahi ngal a.

¹⁵A nekding tampi in ka vualzawl dia; a mi gentheite uh tanghou in ka taisak ding hi.

¹⁶A siampute hotdamna in ka van ding a; a misiangthoute nuamsa in a kikou ding uhi.

¹⁷Huai ah David ki ka selkhe sak ding: ka thaunilh ading in khawnvak ka septa hi.

¹⁸Amah doute zahlakna in ka van ding a, amah tung ah zaw a lallukhu a te sengsung ding hi, chi in.