Read Paite Chin SAM 135 Bible Online

SAM 135 - Paite Chin bible

SAM 135

¹TOUPA phat un. TOUPA min phat un; TOUPA sikhate aw, amah phat un:

²Nou TOUPA inn ading a, Pathian inn huangsung intual a dingte aw,

³TOUPA phat un; TOUPA lah a hoih ngal a; A min phat in lasa un, a nuam hi.

⁴TOUPA’N Jakob amah ading in a tel a, Israelte a gou tuam ding in a tel hi.

⁵TOUPA thupitak ahi chih leh, I TOUPA Pathian tengteng sang a tungnung ahi chih, i thei ngal uhi.

⁶TOUPA’N a ut peuhmah, van ah, lei ah, tuipi ah, tuithukpite ah a hih hi.

⁷Aman meipite kawlmong a kipan in a paitou sak a; khophiate vuah in a siam hi; a sum in a kipante bang in huih a lakhia hi.

⁸Aman Aigupta gam ta masate a that a, mihing leh sate leng.

⁹Aigupta gam aw, amah chiamtehnate leh thillamdangte na sung ah a honsawl a, Pharo tung ah leh a sikhate tung ah.

¹⁰Aman nam tampi a that a, kumpipa thupi taktakte a that hi.

¹¹Sihon Amorte kumpipa leh Og Bashan gam kumpipa leh, Kanaan gam a mi tengteng.

¹²A gam uh gouluah ding in a pia a, a mi Israelte goutan ding in.

¹³TOUPA aw, na min tangtawn in a om ding a; TOUPA aw, nangmah theihgigena suan omsung teng in leng a om ding hi.

¹⁴TOUPA’N a mite vai a hawmsak in, a sikhate tungthu ah a lungsim lah a kisik dek ngal a.

¹⁵Namchih milimte dangka leh dangkaeng ahi ua, mihing khutsuak ahi uhi.

¹⁶Kam a nei ua, a pau kei ua; mitte a nei ua, a mu theikei ua;

¹⁷Bilte a nei ua, a za theikei ua; a kam uah hatna a omsam kei hi.

¹⁸Amau bawlte amaute bang in a om ding uh, huaite gingta peuhmahte.

¹⁹Israel inkuanpihte aw, TOUPA phat un: Aron inkuanpihte aw, TOUPA phat un:

²⁰Levi inkuanpihte aw, TOUPA phat un; TOUPA laumite aw, TOUPA phat un.

²¹TOUPA Zion a kipan phat in om hen, Jerusalem a tengpa ngei, TOUPA phat un.