Read Paite Chin SAM 138 Bible Online

SAM 138 - Paite Chin bible

SAM 138

¹Na kiang ah ka lungtang teng in kipahthu ka gen ding a: pathiante ma ah nang phat in la ka sa ding hi.

²Na biakin siangthou lam nga in k’on be dia, na chitna leh Na thutak ziak in na min ka phat ding: Na thu na min sang in na hihlianta hi.

³K’on sap ni’n nang n’on dawng a, ka hinna na hatna in n’on hihhat hi.

⁴TOUPA aw, lei a kumpipa tengteng in kipahthu a honhilh ding ua, na kam a thupawtte a zata uhi.

⁵Ahi, TOUPA lampite la in a sa ding ua: TOUPA thupina lah a thupi ngal a.

⁶TOUPA tungnung tak ahi na a, mi neute a limsak hi: mi kisatheite bel gamlapi a kipan in a thei hi.

⁷Mangbatna lak ah vak mah leng nang n’on hihhalh ding a; hondoute hehna sual ding in na khut na zak ding a, na khut taklam in n’on hondam ding hi.

⁸TOUPA’N ka tungtang a a hih ding a tangtun ding hi: TOUPA aw, na chitna tangtawn in a om ding a; nangmah khut thilhihte tawpsan ken.