Read Paite Chin SAM 140 Bible Online

SAM 140 - Paite Chin bible

SAM 140

¹TOUPA aw, migilou apan hon humbit inla; mi ngongtat apan honhum in:

²Amau a lungtang uah thilhihkhelhte a ngaihtuah ua: dou din a kikhawm uhi.

³A lei uh gul bang in a hiamsak ua; a kam sung uah thangtom gu a om hi. Selah

⁴TOUPA aw, migilou salou khut lak ah hon kem hoih inla; mi ngongtat lak ah honhum in: amau ka khe kalsuante sawnkawi a tum uhi.

⁵Mi kisatheite’n ka awkna ding in thang a guk kam ua, khauhualte toh; lamsik ah len a phah ua; ka awkna ding in thangte a kam uhi. Selah

⁶TOUPA kiang ah, nang zaw ka Pathian na hi: TOUPA aw, hehpih ka ngetna awte na bil na doh in.

⁷TOUPA Pathian aw, ka hotdamna hatna aw, nang kisual ni chiah ka lu n’on khuhsak a.

⁸TOUPA aw, migilou salou deihlamte zaw phal kenla; a ngaihtuahna gilou piching sak ken; huchi kei leh a kipahtawi kha ding uhi, ka chi a. Selah

⁹Hon umsuakte lu amau muk a thuginalou a gen un khuh hen.

¹⁰Meiamte a tung uah kia henla: mei a paih in om uhenla; a thoh taklouhna ding un kawkhuk thupitak ah paih in om uhen.

¹¹Thu hoihlou genpa lei ah hihkip in a omkei ding a: mi ngongtat hihse ding in thil hoihlou in a zong ding hi.

¹²TOUPA’N gimthuakte a gum ding chih ka thei, tagahte adin diktak in vai a hawm ding.

¹³Pellou in mi diktatte’n na min a phat ding ua; midikte na ma ah a om ding uhi.