Read Paite Chin SAM 141 Bible Online

SAM 141 - Paite Chin bible

SAM 141

¹TOUPA, k’on sam hi, ka kiang ah hongpai meng inla: k’on sap in ka aw ah bil na doh in.

²Ka thumna gimnamtui bang in na ma ah hihkhiak in om henla; ka khutzak nitaklam kithoihna bang in om hen.

³TOUPA aw, ka kam bul ah vengmi tusak inla; ka muk kongkhak veng in.

⁴Gilou salou thil hihkhial mite hih bang in, thil hoihlou lam ah ka lungtang kiheisak kenla; a neklimte uh hon nesak ken.

⁵Mi diktat in honsat hen, migitna ahi ding; hon taihilh hen; thau manpha ahi ding a, Mi gilou salou in ka lutang thaunilh ngeikei hen, a nasep giloute hua in ka thum gige hi.

⁶Amau mawhpaih dingte kiang a piakkhiak a hih chiang un, TOUPA thu a dik chih a thei ding uh.

⁷Mi’n lei a leh a, a hihzan bang in a guhte uh han gong ah thehdalh in a om ding.

⁸TOUPA Pathian aw, ka mit in nang lam a en nak a: nangmah ah ka muanna ka nga a; ka hinna vuaktang in nuse ken.

⁹Ka awkna ding a a thangkam lak uah hon hum in, thil hihkhialte thang lakte ah.

¹⁰Kei ka suakta ding a, mi gilou salou amau len ah awk uhen.