Read Paite Chin SAM 142 Bible Online

SAM 142 - Paite Chin bible

SAM 142

¹Ka aw in, TOUPA ka sam a; ka aw in TOUPA kiang ah hehpihna ka ngen hi.

²A ma ah ka mangbat thu ka gen a; a ma ah ka buaina ka theisak hi.

³Ka kha ka sung a a bahlai in, nangmah in ka lampi na thei a. Ka paina lampi ah ka awkna ding in thang a guk kam uhi.

⁴Ka taklam ah om inla, en dih, kuamah honthei a omkei ua; ka kihumbitna a omta kei a; kuamah himhim in ka hinna a limsakta kei hi.

⁵TOUPA aw, k’on sam a; nang ka kihumbitna, mihing gam a ka tantuam na hi, ka chi a.

⁶Ka kikou husa ngaikhia in; nakpitak a hihniam in ka om a. Hon simmohte lak ah hon humbit in; kei sang in a hat zaw ngal ua.

⁷Na min ka phat theihna ding in, ka hinna suangkulh a kipan in pikhia in: mi diktatte’n hon umsuak ding ua; nang hoihtak a n’on hih ding ziak in.