Read Paite Chin SAM 143 Bible Online

SAM 143 - Paite Chin bible

SAM 143

¹TOUPA aw, ka thumna ngaikhia inla; hehpih ka ngetna ah bildoh inla; na ginomna ziak leh na diktatna ziak in hon dawng in.

²Na sikha tung ah vaihawm ken; na mitmuh ah mihing himhim siamtang a om ding lah a om kei uhi.

³Melma in ka hinna a simmawh a; ka hinna lei ah a satpuk a: sawtpi a sisa bang in, mun mial te ah hon omsak hi.

⁴Huaiziak in ka kha ka gilsung ah a bah a: ka lungtang ka gilsung ah a mangbang hi.

⁵Nidanglai nite ka theigige a; na thilhihte teng ka ngaihtuah zel a na khut nasepte ka sut zel hi.

⁶Ka khutte nang lam ah ka zak zel a, ka hinna, gam zawngkhal tak bang in, nangmah ah a dangtak hi. Selah

⁷TOUPA aw, hon dawng meng in, ka kha a bah hi; kei apan na mai selken; huchilou in zaw kawkhuk a paisukte banglel in ka na om kha ding hi.

⁸Zingsang in na chitna thu hon theisak in; nang lah k’on muang ngal a, ka paina ding lampi hon theisak in; ka lungsim lah na kiang ah ka koih kip zel hi.

⁹TOUPA aw hondoute lak ah hon humbit in; n’on na sel ding in na kiang ah k’ong tai hi.

¹⁰Na deihlam hih hon kisinsak in; ka Pathian lah na hi ngal a: na kha hoih in lamphei ah honpi zel hen.

¹¹TOUPA aw, na min ziak in hon hihhalh inla: na diktatna ziak in ka hinna mangbatna a kipan pikhia in.

¹²Na chitna ziak in hondoute hihmang inla, ka hinna hih mangbangte tengteng hihmang in; na sikha ka hi uhi.