Read Paite Chin SAM 144 Bible Online

SAM 144 - Paite Chin bible

SAM 144

¹TOUPA ka suangpi phat in om hen, Aman ka khutte galdou a zilsak a, ka khutzungte dou ding in a chil hi.

²Ka chitna leh ka kulhpi, ka insang leh hon humbitpa, ka phaw leh ka muanna ngakna ka nuai a ka mite zouzelpa ahi.

³TOUPA mihing bang ahia, huchitel a amah na theih naknak? Mihing tapa leng kua ahia a hih, Na ngaihtuah naknak?

⁴Mihing zaw bangmahlou lel ahi a: a damsung nite lim mang zel bang ahi.

⁵TOUPA aw, na vante kunsak in hong paisuk inla: tangte khoih in, huchi in a khukhe ding uhi.

⁶Khua phesak inla, amau dalhsak in na thalte kapkhia inla, hih buaigawp in.

⁷Tunglam a kipan in na khut in hon sawk inla; tuilian a kipan in: hon honkhia in.

⁸A kam un bangmahlou a gen ua, a khut taklam uh diklouhna khut taklam ahi.

⁹Pathian aw, nangmah pahtawi in la thak ka sa ding a: pekging gui sawm nei a nangmah phat in la ka sa ding hi.

¹⁰Amah ahi, kumpipate kiang a hotdamna pia a, namsau mi hihsethei lak a a sikha David honkhepa pen.

¹¹Hon honkhia inla, mikhualte khut a kipan hon humbit in, a kam un thu bangmahlou peuh a gen nak ua, a khut taklam uh khut taklam diklou ahi.

¹²Ka tate uh a hong valnou ua sing nou dipdip bang a a om ua; ka tanute uleng Inpi omdan gel bang a a ning a suangkhuak bang a a om hun un;

¹³Ka buh innte uh a dim a, thil chichih a om phetphut a; ka belamte un leng nou a sang a sang a tam, a sing a sing a tam ka mun ua a neih chiang un;

¹⁴Ka bawngte uh a hong suanphat a; nou neihsiat himhim a omlouh a; inn sung loh hiam leh pawtkhia a omlouh a, ka kongzingte ua kikou husa a omlouh chiang in;

¹⁵Huchibang a om mite kipaktak in a om nak uhi: ahi, TOUPA Pathian a nei mite kipaktak in a om nak uhi.