Read Paite Chin SAM 145 Bible Online

SAM 145 - Paite Chin bible

SAM 145

¹Kumpipa aw, ka Pathian, k’on pahtawi ding a; na min tangtawn tangtawn in ka phat ding hi.

²Niteng in k’on phat ding a; na min tangtawn tangtawn in ka phat ding hi.

³TOUPA a thupi a, nakpitak a phat ding ahi; a thupidan suikhiak vual ahi kei hi.

⁴Suan khat in suandang kiang ah na thilhihte a phat sawnsawn ding a, na thilhih thupitakte a theisak ding hi.

⁵Nangmah pahtawina kilawm dan thupitak leh na thillamdang hihte ka ngaihtuah ding hi.

⁶Mite’n na thilhih mulkimhuaite hatdan a gen ding ua; ken leng na thupidan ka theisak sam ding hi.

⁷Na hoihna thupitak a theih uh a gen ding ua, na diktatna nuamsatak in la in a sa ding uhi.

⁸TOUPA mi hehpihthei, chitna a dim, lungnel, chitna thupitak nei ahi.

⁹TOUPA bangkim tung ah leng a hoih hi; a chitnate a thilsiamte tung ah a om hi.

¹⁰TOUPA aw, na thilsiam teng in na kiang ah kipahthu a honhilh ding ua; misiangthoute’n nang a honphat ding uhi.

¹¹Na gam thupidan thu gen in, na thil hihtheihna thu houlimna in a zang ding ua;

¹²Mihing tate kiang a a thilhih thupitakte leh, a gam kilawmna thupidan theisak ding in.

¹³Na gam tangtawn gam ding ahi a, na thuneihna suan omsung teng in a om gige ding hi. TOUPA a thute ah a muanhuai a, a nasepte ah deihsak a siam hi.

¹⁴TOUPA’N a pukte a len gige a, kun kheukheu a omte a kaitang hi.

¹⁵Amau tengteng mit nang tung ah a tu a; a hun tak ah a annek ding uh na pia hi;

¹⁶Na khut na zak a, thil hing teng deih na hih taisak hi.

¹⁷TOUPA a lampi tengteng ah a dik a, a nasep peuhmah a mi hehpihthei ahi.

¹⁸TOUPA amah min lou tengteng kiang ah a nai hi, thudik a Amah lou peuhmahte kiang ah.

¹⁹Amah laute deihlam a hih tangtung ding a; a kahna uh a za ding a, a hondam ding hi.

²⁰Amah it tengteng TOUPA’N a hawi a; himahleh migilou a hih mangthang ding.

²¹TOUPA phatna ka kam in a gen ding a; sa peuhmah in a min siangthou tangtawn tangtawn in phat uhen!