Read Paite Chin SAM 147 Bible Online

SAM 147 - Paite Chin bible

SAM 147

¹TOUPA phat un! Pathian phat a lasak a hoih a; amah zaw mi deihsak a siam a, phat a kilawm him ahi.

²TOUPA’N Jerusalem a dingsak nawn a; Israel delh khiakte a pikhawm nawn hi.

³Khasiate a hihdam a, a liamnate uh a tuam zel hi.

⁴Aksi tamdan a sim a; a min uh a sa chiat hi.

⁵TOUPA a thupi a, thilhihtheihna ah leng hattak ahi; a pilna in tawpni a neikei ding hi.

⁶TOUPA’N thunuailutte a len gige a; migilou saloute lei ah a hihniam zel hi.

⁷Kipahthugen a TOUPA pahtawi in lasa unla; kaihging toh i Pathian phat in lasa un.

⁸Aman van meipi a khuhsak a, lei ading in vuah a sutuah a, tangte ah loupa a pousak hi.

⁹Aman sa kiang ah a nekding a pia a, va-aknou hamhamte kiang ah toh.

¹⁰Aman sakol hatna ah a kipak kei a; mihing khe tungte ah leng kipahna himhim a neikei naknak hi.

¹¹TOUPA amah laute tung leh a chitna lamente tung ah a kipak hi.

¹²Jerusalem aw, TOUPA phat un; Zion aw, na Pathian phat in.

¹³Aman na kulh kongkhakte kalhna singtawnte a khauhsak a; na sung a na tate om lah a vualzawl ngal a.

¹⁴Na gamgi sung ah lemna a bawl a; buh hoihpen in a hon hihdim hi.

¹⁵A thupiak lei ah a sawl khia a: a thu hattak in a tai hi.

¹⁶Vuk belam mul bang in a pia a; vuk kia vut bang in a theh zak hi.

¹⁷A tui khal tanghou them bang in a paikhia: amah votna ma ah kua ahia ding thei ding?

¹⁸A thu a sawlkhia a, huaite a zulsak a, huih a nungsak a tuite a hongluang hi.

¹⁹A thu Jakobte kiang ah a langsak a, a thusehte leh a vaihawmte Israelte kiang ah a langsak hi.

²⁰Aman kua nam tung ah mah huchibang in a hih ngeikei a; a vaihawmte a thei sam kei uhi. TOUPA phat un!