Read Paite Chin SAM 16 Bible Online

SAM 16 - Paite Chin bible

SAM 16

¹Pathian aw, hon humbit in: nangmah ah ka ginna ka koih hi.

²TOUPA kiang ah, Nang tuh ka TOUPA na hi a; Nang loungal thil hoih himhim ka neikei.

³Lei a Mi Siangthou omte zaw, amau zaw mi hoih, ka kipahna teng omna ahi uh, ka chi ahi.

⁴pathian dangte kiang a taite zaw, a lungkhamnate uh a pung ding: a sisan dawn kithoihna uh ken zaw ka lan kei ding a, ka muk in a minte uh ka lou sam kei ding hi.

⁵TOUPA ka goutan leh ka nou tan ahi: nang ka tantuam n’on hihkip sak zel hi.

⁶Tehna khaute mun nuamtak ah ka tuam ding in a keta ahi; ahi, gou hoih tak ka luahta ahi.

⁷TOUPA, suangtuahsakpa, ka phat ding a: ahi, zanchiang in ka lungsim hon hilhpil zel hi.

⁸TOUPA ka ma ah ka omsak gige a; ka taklam a a om ziak in ka ling kei ding hi.

⁹Huaiziak in ka lungtang a kipak a, ka thupina a nuam hi: ka sa leng bittak in a om ding hi.

¹⁰Ka kha Sheol ah na nuse kei ding a: Na Mi Siangthou muatna mu ding in na phal sam kei ding hi.

¹¹Nang hinna lampi n’on theisak ding a; na ma ah nuam dimletna a om hi; na khut taklam ah tangtawn kipahna ding a om hi.