Read Paite Chin SAM 17 Bible Online

SAM 17 - Paite Chin bible

SAM 17

¹TOUPA aw, ka dikna thu za inla, ka kikou husa ngaikhia inla, ka thumna, zuauthu genhat muk a pawt hilou ah, bil na doh in;

²Ka tung a thupukna na ma a kipan a pawt hi henla; na mit in khentuam neih louhna en hen.

³Ka lungtang na enchian a; zan in na hongpha a; n’on endikta a bangmah na mu hetkei a; ka kam in a genkhial kei ding ka chi chiltel ahi;

⁴Mihing thilhih ah zaw, na muk a thupawt ziak in mihing ngongtat lampi a pailou ding in ka kikem hoih ahi;

⁵Ka kalsuante’n na lampi a tawn ziahziah a, ka khete a tal ngeikei hi.

⁶Pathian aw, ka honsam zel a, nang lah n’on dawng ding a: kei lam ah na bil hondoh inla, ka thugen ngaikhia in;

⁷Nangmah a ginna koih peuhmahte kiang a, na khut taklam a amau sualte hondam zelpa aw, na chitna lamdang kilang sak in.

⁸Mit laimu bang in honkem inla, na kha nuai ah hon busak in.

⁹Migilou salou hon hihsia a, hondou a hon um kim lak ah.

¹⁰Amaute thau a um in a om ua, a kam un kisatheitak in thu a gen uhi;

¹¹Tuin ka kalsuanna peuhmah a hon umsuak a, hon hihpuk ding in a mitte uh ka tung uah a tu sak uhi;

¹²Amah humpinelkai sa keih ut bang leh humpinelkai lunlai mun dai peuh a buk nilouhlouh bang ahi.

¹³TOUPA aw, thou inla, amah maituah pih inla, kunsak in: ka hinna migilou salou lak ah na namsau in humbit in.

¹⁴TOUPA aw, na khut in mihingte lak ah, khovel mihingte lak ah, humbit in; amau tuam zaw tu damsung a a neih uh ahi a, a gil uh na gou in na dimsak naknak a; tate lungkim huntak in a nei ua, a sum zat val uh a tangekte uh ading in a sihsan zel uhi.

¹⁵Ken zaw diktatna nei in na mel ka mu ding a; nangmah batna nei a ka hah chiang in ka lungkim hun mahmah ding hi.