Read Paite Chin SAM 18 Bible Online

SAM 18 - Paite Chin bible

SAM 18

²TOUPA ka suangpi leh ka kulhpi, Hon humbitpa ahi; ka Pathian ka suangpi kiptak ahi a, amah ah ginna ka koih ding; ka phaw, ka hotdamna ki leh ka insang ahi;

³Phat tuak TOUPA ka sam ding a, Hondoute lak ah hotdam in ka om ding hi.

⁴Sihna khauhualte’n a hon gak a, Pathian limsaklouhna tuihual in hontum a;

⁵Sheol khauhualte’n a hon gaksuak a: sihna thangte ka kimvel in a om hi.

⁶Ka lungkham a TOUPA ka sam a, ka Pathian ka sam hi. Aman a biakin apan ka aw a za a, a ma a ka kikou husa a bil ah a lutta hi.

⁷Huaitak in lei a ling a, a kisatta a, a heh ziak in tangte leng a kingakna nangawn toh a kisat in a lingta hi;

⁸A nak a kipan in meikhu a zamtou a, a kam a pawt mei in a kang zuazua a, meihol leng a kuangsak hi.

⁹Aman vante kunsak in, a hohsuk a; A khenuai ah mial bikbek a om hi.

¹⁰Cherub tung ah a tuang a, a lengta hi, ahi, huih khuate ah a leng vengveng hi.

¹¹Mial bukna mun ah, amah umna bukta in, a bawl a; tui a mialna, van a meipite mah;

¹²A ma a vakna ziak in a meipite a theng a, gialte leh meiamte a ke toktok uhi.

¹³TOUPA van tung ah a ging dodop a, Tungnungpen in a aw a suaksak a; gialte leh meiamte a ke toktok uhi.

¹⁴A thalte a kapkhia a, amau a hihzak hi; ahi, khua a phe zolzol nilouh a, a hihbuai vengvung hi.

¹⁵Huaitak in, TOUPA aw, na tai ding a, na nak a hu pawt in a mut ziak in, tui luannate a hong kilang a, leilung kingaknate hihlat in a omta hi.

¹⁶Aman tunglam a kipan in a honsawk a, honlen a; tui tampi a kipan hon kaikhia hi;

¹⁷Kei galhattak lak ah hon humbit a, hon hawte lak ah leng; kei ding in a hat lawzen ngal ua;

¹⁸Amau ka vangtah ni’n honsual ua, himahleh TOUPA ka ginpi pen ahi;

¹⁹Aman mun awngthawl ah hon pikhia a; ka tung a a kipah ziak in hon humbitta ahi.

²⁰TOUPA’N ka diktatdan bang in ka tung ah a hih a; ka khutte a siangthou dan bang ngei in a hondin ahi;

²¹TOUPA lampite ka tawn a, ka Pathian kiang a kipan gilou tak in ka pai mang ngei ngal kei a;

²²A vaihawmna tengteng ka ma ah a om a, a thusehte ka pai ngei ngal kei hi;

²³Amah lak ah gensiatbei ka hi a, ka siatna a kipan ka kihuikhe zel hi.

²⁴Huaiziak in TOUPA’N ka dikdan bang in hon na dinta a, ka khutte a mitmuh a a sianthou bangzel in.

²⁵Mihehpihthei takte lak ah hehpihthei tak in na kilang ding a; mi hoihkimte lak ah hoihkim in na kilang ding a;

²⁶Misiangthoute lak ah siangthou in na kilang ding a; huan, genhakte lak ah genhak in na kilang ding hi;

²⁷Gimthuak mite hondam ding na hi ngal a; mi kisatheite bel na hihniam ding hi;

²⁸Nang ka khawnvak n’on detsak ding ahi ngal a: TOUPA ka Pathian in ka mialna a hihvak ding hi.

²⁹Nang hon panpih in gal ka delh ngal a; ka Pathian panpih mah in kulh dai ka tawmkan ahi.

³⁰Pathian lampi a hoihkim a, TOUPA thu etdik ahita hi; amah a ginna koih tengteng ading in amah tuh phaw ahi.

³¹TOUPA lou Pathian kua a om a ahia? I Pathian lou Suangpi kua a om a ahia?

³²Hatna hon tengsakpa leh ka lampi hih hoihkimpa Pathian mah;

³³Aman ka khe zukpi khe bang in a bawl a, ka mun sangte ah hon omsak hi;

³⁴Ka khutte galdou ding in a chil a, ka bante’n dal thalpeu a lai zou hial hi.

³⁵Nang na hotdamna phaw n’on pia a: na khut taklam in honkai a, na kingaihniamna in n’on bawllian hi.

³⁶Ka nuai a ka kalsuanna na hihlian a, huchi in ka khete a teu kei hi;

³⁷Hondoute ka delh ding a, ka delh pha ding: hih manthat a a om masiah uh ka kihei kikta kei ding hi.

³⁸A thohnawn theihlouhna ding un ka sattan dia: ka khe nua’h a puk ding uhi;

³⁹Nang kidouna ading in hatna ka tai ah n’on tengsak a: honsualte ka nuai ah na zouta hi.

⁴⁰Honhawte ka hih manthat theihna din, nang hondoute hon nunglehngatsan ding in na omsakta hi.

⁴¹Amau a kikou ua, himahleh hondampa ding kuamah a omkei uh: TOUPA a sam ua, himahleh a dawng tuankei hi.

⁴²Huaitak in leivui huih mutleng bang in ka satnen a: kholak buannawi bangphet in ka paikheta hi.

⁴³Nang mite kilaina lak ah n’on humbit a; namchih lutang ding in na honsiam a, ka theih ngeilouh mite’n ka nek ka tak a bawlta ding uhi.

⁴⁴Ka tanchin a zaktak un ka thu a mang ding ua; mikhualte ka kiang ah a kipe ding uhi.

⁴⁵Mikhualte a vul ding ua, a insang ua kipan in ling kawm in a hongsuk ding uhi.

⁴⁶TOUPA a hing hi; ka suangpi phat in om henla; hon hondampa Pathian pahtawi in om hen:

⁴⁷Phu hon laksakpa leh, michih ka nuai a zoupa Pathian ahi.

⁴⁸Aman hondoute lak ah hon honkhia a: ahi, nang kei honsualte tunglam ah n’on domkang a: Mi hiamgamte lak a kipan na hon humbit zel hi.

⁴⁹Huaiziak in, TOUPA aw, namchih lak ah kipahthu k’on hilh ding a, nang phat in la ka sa ding hi.

⁵⁰Aman hotdamna thupitak a kumpipa bawl kiang ah a pe zel a; a thaunilhpa tung ah, David leh a suante tung ngei ah, tangtawn in a chitna a langsak ding hi.