Read Paite Chin SAM 21 Bible Online

SAM 21 - Paite Chin bible

SAM 21

¹TOUPA aw, kumpipa tuh na hatna ah a nuam ding a, na hotdamna ah nuamsa na zouzen inchia!

²A lungtang deihlam na pia a, a muk a thilnget na phallou kei hi. Selah

³Hoihna a vualzohnate in na dawn a: dangkaeng siangthou kumpi lukhu na khusak hi.

⁴Aman hinna hon ngen a, na pia a tangtawn tangtawn a damna.

⁵Na hotdamna ah a thupina a lian mahmah ahi: pahtawina leh thupina tung ah na nga zel hi.

⁶Tangtawn a ding in vualzawlna liantak mu in na bawl a: Na ma a nopsakna in na kipaksak hi.

⁷Kumpipa’n TOUPA a muang a, tungnungpen chitna ziak in a ling kei ding hi.

⁸Na khut in nang hondoute tengteng a zongkhe vek ding a: na khut taklam in nang hondoute a zongkhe ding hi.

⁹Na heh hun chiang in amau haltuina meikuang lutlut bang in na bawl ding. TOUPA’N amau heh in a valh khin ding a, mei in a kang mang mai ding hi.

¹⁰A gahte uh lei a kipan na hihmang ding a, a suante uh mihing tate lak a kipan in na hihmang behlap ding hi.

¹¹Na tung ah thil gilou hih a tum ua; thil gilou a ngaihtuah khia ua, a hih tangtung thei ngal kei uhi.

¹²Nang amau na kiheisak dek a, na thalpeu khaute a maitang uah laisa in na bawl ding hi.

¹³TOUPA aw, na hatna ah pahtawi in hongom in: huchi in na thilhihtheihna phat in la ka sa ding uhi.