Read Paite Chin SAM 22 Bible Online

SAM 22 - Paite Chin bible

SAM 22

¹Ka Pathian, ka Pathian, bang achia hon paisan? Bang achia hon panpih ding a na gamlat mahmah a, ka thumna thute a kipan a na gamlat?

²Ka Pathian aw, sun in ka kikou a, himahleh na dawng tuankei a; zan in leng ka kikou a, ka dai tuankei hi.

³Himahleh, nang Israelte phatna a tengpa aw, nang zaw na siangthou hi.

⁴Ka pipute un nang hon na muang ua: a muang ua, huchi in nang na humbit zel hi.

⁵Nang honsam ua, huchi in, humbit in a om zel ua: honmuang ua, huchi in zahlak in a om ngeikei uhi.

⁶Kei zaw mihing ka hi kei a, tangtel phet ka hi a; mihingte gensiat leh mite muhsit ka hi.

⁷A honmu peuh in hon nuihsan ua, a muk uh a lawksak ua, a lu uh a sing uh;

⁸TOUPA muang hi ven, aman amah humbit leh a ke: a tung a a kipah ziak in humbit leh ake, a chi uhi.

⁹Nang sul a kipan a hon lakhepa na hi a: ka nu ang a nawi ka teplai nangawn in nang muandan n’on sinsaksakta hi.

¹⁰Sul a kipan him in nangmah tung ah ngak ka na hi a: nang ka nu gilsung ah ka Pathian na hi hi.

¹¹Hon gamlat mahmah ken; mangbatna ding a nai ngal a; panpihpa ding a om tuankei hi.

¹²Bawngtal tampi in hon umsuak ua: Bashan gam a bawngtal hattakte’n hon umsuak uhi;

¹³Humpinelkai duhgawl humham bang in a hon kamkat khum uhi.

¹⁴Tui bang a buak khiak in ka om a, ka guh tengteng leng a kilawi hi; ka lungtang khuainun bang ahi a, ka gil lak ah a zul khinta hi;

¹⁵Ka tha belpei bang in a keu khin a; ka lei ka dangtawng ah a belh bikbek a; nang sihna leivui ah n’on pilutta hi.

¹⁶Uite’n a hon umsuak ua: thil hoihlou hih omkhawmte’n hon umbit ua; ka khut leh ka khete a vut uhi.

¹⁷Ka guh tengteng ka sim thei a; amau lah hon en in hon ensal ua;

¹⁸Ka puansilhte a kihawm ua, ka puanak ding in ai a san uhi.

¹⁹Nang bel, TOUPA aw, hon gamlat mahmah ken! Hon hihhatpa aw, hon panpih ding in hongkin in!

²⁰Ka hinna namsau lak ah humbit inla; ka neih sun pentak ui thilhihtheihna lak ah humbit in!

²¹Humpinelkai kam a kipan in hon hondam inla; ahi, gam bawngtal ki a kipan in ka kha hondam in!

²²Ka unaute kiang ah na min ka hilh ding a: kikhawmte lak ah ka honphat ding hi;

²³TOUPA laudansiamte aw, amah phat un; Jakob suan tengteng aw, amah pahtawi un: Israel suante aw, amah kihta un:

²⁴Aman gimthuakmi gimdan a musit ngal kei a, a kih sam kei hi; a mai lah a lak ah a sel kei hi; amah a sap in a ngaikhe zaw hi.

²⁵Kikhopna thupitak a k’on phat zel zaw nangmah na hi: A laudan siamte ma ah ka thuchiam ka tangtun ding hi.

²⁶thunuailutte’n a ne ding ua, a tai ding uh: amah zongte’n TOUPA a phat ding uh: na lungtang uh tangtawn in hing in om hen!

²⁷Kawlmong mi tengteng in leng a thei nawn ding ua, TOUPA lam a ngat ading uh: namchih a chichih na ma ah a kun ding uhi.

²⁸Gam TOUPA a ahi a, namchih tung a vaihawmpa ahi.

²⁹Lei a mi neizou tengtengte’n a ne un a be ding ua; leivui dia paisuak dingte a ma ah a hong kun ding uhi, amau hinna hingsak gige theiloute.

³⁰Chisuan in amah nek leh tak a bawl ding a; khangthak hongom nawnte kiang ah TOUPA tanchin a hilh ding uhi.

³¹A hongpai ding ua, nam hongpawt ding kiang ah, A hihkhinta, chi in, a diktatdan a hon theisak ding uhi.