Read Paite Chin SAM 24 Bible Online

SAM 24 - Paite Chin bible

SAM 24

¹Leitung leh asung a thil om tengteng TOUPA a ahi a; khovel leh asung a om tengteng toh;

²Tuipite tung a lei amah muhkhiak ahi a, tuite tung a amah hihkip ahi.

³TOUPA tang ah kua a paitou dia, a Mun Siangthou ah kua ading ding?

⁴Khut siang leh lungtang siangthou nei a, a lungsim thulimlou lam a koih ngeilou a, khem tum a kichiam ngeilou mi.

⁵Aman TOUPA kiang a kipan vualzawlna a mu ding a, a hondampa Pathian kiang a kipan diktanna leng a mu ding hi.

⁶Huai tuh amah zawngmi suan ahi. Jakob Pathian aw, na mel zongte mah. Selah

⁷Kongpite aw, na lutang uh sangsak un: nou tangtawn kongkhakte aw, kikhai sang un! Huchi a thupina Kumpipa honglut theihna ding in.

⁸Thupina Kumpipa kua ahia? TOUPA hattak leh thilhihtheitak, TOUPA kidouna a thilhihtheitak, ahi!

⁹Kongpite aw, na lutang uh sangsak unla, ahi, tangtawn kongkhakte aw, kikhai sang un! Huchi a thupina Kumpipa a honglut theihna ding in.

¹⁰Hiai thupina Kumpipa kua ahia? Sepaihte TOUPA amah mah thupina Kumpipa ahi. Selah