Read Paite Chin SAM 25 Bible Online

SAM 25 - Paite Chin bible

SAM 25

¹TOUPA aw, ka lungsim na kiang ah ka koih den zel a.

²Ka Pathian aw, nang k’on muang hi, zahlak in hon omsak kenla; hondoute honzoh phal ken.

³Ahi, nang hon ngakte kuamah zahlak in a omkei ding uh. A ziak omlou a lepchiahtak a gamtate zahlak in a om ding uh.

⁴TOUPA aw, na lampite hon theisak inla; na lamtate tanchin honhilh in.

⁵Na thutak ah honpi inla, honhilh in, Nang hon hondampa Pathian na hi ngal a: nitum in k’on ngak nilouh hi.

⁶TOUPA aw, na lainatna leh na chitnate theigige in; tuma a na om gige sa ahi ngal a.

⁷Ka valnou lai khelhnate leh ka tatleknate theigige kenla; TOUPA aw: na hoihna ziak in, na chitna bangzel in hon theigige in.

⁸TOUPA zaw a hoih in a dik ahi: huaiziak in mikhialte lampi a musak ding.

⁹Thunuailutte vaihawmna dik ah a pi ding a: thunuailutte amah lampi tanchin leng a hilh ding hi.

¹⁰A thukhun leh a thu theihsakte zuite ading in TOUPA lampi tengteng chitna leh thutak ahi.

¹¹TOUPA aw, na min ziak in ka thu limlouhna ngaidam in, thupitak ahi ngal a.

¹²TOUPA kihta mi kua ahia? A tel ding lampi a musak ding hi.

¹³A hinna nuamsatak in a om ding a; a suante’n gam a luah ding uhi.

¹⁴TOUPA thuguk amah laudansiamte kiang ah a om, a thukhun amaute a theisak ding hi.

¹⁵Ka mit in TOUPA lam a en gige a: aman ka khete len a kipan in lakhe ding ahi ngal a.

¹⁶Kei lam hong nga inla, hon hehpih in; chim leh haksatak in ka om ngal a.

¹⁷Ka lungtang buainate a hong thupita a; ka mangbatna a kipan hon pikhia in aw.

¹⁸Ka haksatna leh ka thuakdan ngaihtuah inla, ka khelhnate ngaidam in.

¹⁹Hondoute ngaihtuah dih, tampi ahi ua: nakpi petmah in a honhua behlap uhi.

²⁰Ka hinna vom hoih inla, hon humbit in aw: zahlak in hon omsak kenla, nang ah ka ginna ka koih ngal a.

²¹Ka lungsim hoihna leh ka dikna in hon humbit in. K’on ngak nilouh ngal a.

²²Pathian aw, Israelte a mangbatna tengteng ua kipan tankhia in.