Read Paite Chin SAM 26 Bible Online

SAM 26 - Paite Chin bible

SAM 26

¹TOUPA aw, vai hon hawmsak in, lungsim hoihtakpu in ka om a, ginglah lou in ka muang hi.

²TOUPA aw, hon pheklek in hon enchian in; ka lungsim leh ka lungtang hihsiangthou in.

³Na chitna ka ma ah a om ngal a, na thutak ah ka om zel hi.

⁴Mi bangmahlou phette kiang ah ka tu ngeikei a; lepchiahte kiang ah leng ka lut sam kei ding hi.

⁵Thil hoihlou hihte kikhawmte ka mudah a, migilou saloute kiang ah ka tu kei ding.

⁶Ka khutte gensiat beina in ka sil ding a, huchibang in, TOUPA aw, na maitam ka vel ding hi:

⁷Kipahthu genna ngaih tak a ka gen theih a, na thil lamdang hih tengteng thute ka hilh theihna ding in.

⁸TOUPA, na omna inn ka it a, na thupina omna leng.

⁹Ka hinna mikhialte lak ah lakhawm kenla, ka hinna leng sisan suahhatte lak ah lakhawm sam ken.

¹⁰A khut uah ngaihtuah gilou a om a, a khut taklam uh golhna in a dim hi.

¹¹Himahleh kei zaw lungsim hoih pu in ka om ding; hontan inla, hon hehpih in.

¹²Ka khe mun tam tak ah ading a; kikhopna ah TOUPA a phat ding hi.