Read Paite Chin SAM 27 Bible Online

SAM 27 - Paite Chin bible

SAM 27

¹TOUPA ka vak leh hon hondampa ahi; kua ka lau dia? TOUPA ka hinna insang ahi: kua ka kihta dia?

²Thil hoihlou hihte, hondoute leh ka melmate’n, ka sa nektum a hon suallai un, a kisui ua, a puk chiat uhi.

³Sepaih pawlte’n honsual tum in hon giahkhum mahle uh ka lungtang in a kihta kei ding; ka tung ah kidouna hongsuak mahleh, huchipi in leng ka gingta chinten ding hi.

⁴TOUPA kiang ah thil khat ka ngen a, huai mah ka zong ding; TOUPA kilawmdan mu ding leh, a biakin a thu dong ding in ka damsung teng a TOUPA inn a ka om gige theihna ding in.

⁵Mangbat ni’n a bukta ah hon koihkhian ding ahi ngal a, a humbitna puanin ah honsel ding a; suangpi tung ah honkha kai ding hi.

⁶Tuin hondoute, hon umsuakte tunglam ah ka lu dopkang in a om ding; huchi in, a puanin ah nuamna kithoihnate ka lan ding a; la ka sa ding.

⁷TOUPA aw, ka aw a k’on sap leh ngaikhia inla; hon hehpih inla, dawn leng hon dawng in.

⁸Ka mel zong un, chi a na genlai in, ka lungtang in na kiang ah, TOUPA mel ka zong ding, ka chi hi.

⁹Ka lak ah na mai sel kenla; na sikha heh in hihmang ken, nang zaw hon panpihpa na hi gige a; hon hondampa Pathian aw, hon paikhe kenla hon paisan ken.

¹⁰Ka nu leh ka pa’n hon paisanta uhi, himahleh TOUPA’N a hon pomlai ding.

¹¹TOUPA aw, na lampi hon ensak inla; ka melma te ziak in lampi phei mahmah ah honpi in.

¹²Hondoute ut ut a hih ding in honpe mahmah ken; theipih dikloute’n hon sual ua, nunsiat thu sekhe nakte’n.

¹³Mihing gam ah TOUPA hoihna muh kigingta lou hile’ng ka bahta ding hi.

¹⁴TOUPA ngak gige in; hattak in om in, na lungtang kihih hang in; ahi, TOUPA ngak gige in.