Read Paite Chin SAM 28 Bible Online

SAM 28 - Paite Chin bible

SAM 28

¹TOUPA aw, honsam ding hi ing; ka suangpi, kei lam ah na bil ngongsak ken: huchilou in zaw; nang n’on daih san leh, kawkhuk a lutsukte bang lel in ka hongom kha ding hi.

²K’on sap a, ka khutte na biakna Mun Siangthou lam a ka zak leh, hehpih ka ngetna awte ngaikhia in.

³Migilou salou lak leh thil hihkhialte lak ah hon kaimang khawm ken; huaite’n a invengte u kiang ah lemna thu a gen na ua, himahleh a lungtangte uah thilhihkhelhna a theh uhi.

⁴A thilhih bangzel un, a thilhih gitlouh dan bangzel in thuk inla; a khut nasep bang in thuk inla; a gitlouh man uh musak in.

⁵TOUPA nasepte leh a khut a a thilhih a limsak louh ziak un aman amau bawlhoih lou in a hihse ding hi.

⁶Aman ka ngetna awte a ngaihkhiak ziak in TOUPA phat in om hen.

⁷TOUPA ka hatna leh ka phaw ahi a; ka lungtang in amah a muang hi; huchi in huh in ka om hi; huaiziak in nakpitak in ka lungtang a nuam a; ka la in amah ka phat ding hi.

⁸TOUPA a hatna uh ahi a, a thaunilh ading in hotdamna insang ahi.

⁹Na mite hondam inla, na gouluah ding vualzawl in: amaute vak inla, tangtawn in pom in.