Read Paite Chin SAM 30 Bible Online

SAM 30 - Paite Chin bible

SAM 30

¹TOUPA aw, k’on pahtawi ding a; nang n’on kaikhia a hondoute n’on otkhum saklouh ziak in.

²TOUPA ka Pathian aw, k’on sam a, nang n’on hihdamta hi.

³TOUPA aw, nang ka hinna Sheol a kipan na pikhia a; kawkhuk a ka paisuk louhna ding in nang na honhum hing zel hi.

⁴A misiangthoute aw, TOUPA phat in lasa unla, a min siangthou phat un.

⁵A hehna mitphiatkal lel ahi a; a deihsakna ah hinna a om hi; kahna giak ding in nitaklam in a honglut thei a, zingsang in nuamna a hongtung nak hi.

⁶Ken zaw nuam ka sak lai in, Chikmah chiang in ka ling kei ding, ka chi hi.

⁷TOUPA nang na deihsakna ziak in ka mual na ding kipsak ta a; himahleh na mai na sel a, ka hong mangbangta hi.

⁸TOUPA aw, nang k’on sam a; TOUPA kiang ah hehpihna ka ngen hi:

⁹Kawkhuk a ka paisuk leh, ka sisan ah punna bang a om ding! Leivui in honphat ding hia? Na thutak a gen sin maw?

¹⁰TOUPA aw, ngaikhia inla, hon hehpih in: TOUPA, nang hon panpihpa hi in.

¹¹Ka sunna kei din lamna na suaksak a; ka saiip puan n’on suahsak a, kipahna n’on tengsak hi.

¹²Ka thupina dai nilouh lou a, nangmah phat a la a sakna ding in TOUPA ka Pathian aw, tangtawn in kipahthu k’on hilh gige ding hi.