Read Paite Chin SAM 31 Bible Online

SAM 31 - Paite Chin bible

SAM 31

¹TOUPA aw, nangmah ah ka ginna ka koih zel a; chikmah chiang in zahlak in hon omsak kenla: na diktatna ziak in hon humbit in.

²Kei lam ah na bil hondoh inla; hon humbit meng in: kei ding in suangpi kiptak, hon hotdamna ding in bitna in honghi in.

³Nang ka suangpi leh ka kulhpi na hi a; huaiziak in na min ziak in honpi honkai in.

⁴Ka awkna dia a guk a a lenphah lak uah hon kaikhia in; ka insang na hi ngal a.

⁵Na khut ah ka kha k’on kemsak hi: Toupa thutak Pathian, nang n’on tanta hi.

⁶Thil bangpeuh ginalou peuh ngaihtuahte ka hua a; ken bel TOUPA ka muang ahi.

⁷Na chitna ziak in nuam in ka kipak ding a; ka mangbatna na mu gige hi; ka hinna a mangbat lai in na theigige hi.

⁸Hon doumi khut ah n’on khum kei a; ka khe mun awngthawl ah na ngazawta hi.

⁹TOUPA aw, hon hehpih in, mangbang in ka om ngal a; ka mit lungkham na ziak in, ka hinna leh ka pumpi nangawn a se huaihuai hi.

¹⁰Ka damsung lungkhamna in a mangbangta ngei a, ka kumte thumna in a beita hi: ka thulimlouhna ziak in ka tha a zaw a, ka guhte leng a segawp hi.

¹¹Hondoute ziak in ka min a hong seta a, ahi ka vengte lak ah nakpi’n a seta hi, ka meltheihte ading in leng kihtakhuaipi ka hita hi: khaw lak a hon mute’n hon taisan ta ngal ua.

¹²Misi a mangngilh bang tak un mangngilh in ka om a: bel kitam banglel ka hita hi.

¹³Mi tampi honhekna ka za ngal a, ka kim a kihtakhuai om hon sawmkhawm lai un, ka hinna honlaksak a tum uhi.

¹⁴Himahleh, TOUPA aw, k’on muang a: ka Pathian na hi ka chi hi.

¹⁵Ka hunte na khut ah a om a, hondoute khut a kipan leh hon simmohte lak ah hon humbit in.

¹⁶Na mel in na sikha hon sunvak in; na chitna ziak in hon hondam in.

¹⁷TOUPA aw, zahlak in hon omsak ken; k’on sam ngal a: migilou salou zahlak in om uhen, Sheol ah dai dinden in om uhen.

¹⁸Muk zuautheite pau theilou in om uhen; huaite’n kisathei leh musit kawm in pautal tak in mi diktatte a gense zel uhi.

¹⁹Na hoihna, nangmah laudansiamte ading in na kholkhawm thupi natel e! Mihing tate mitmuh a muanna koihte ading a na hihsak pen tak.

²⁰Amau mihing omna lak ah na humbitna na mitmuh in na selgu dia: lei selhatna lak ah bukta ah na koih gu ding hi.

²¹TOUPA phat in om hen: a chitdan lamdangtak khopi kiptak ah a hon musak ngal a.

²²Kei lah, hamhaih in, na mitmuh apan paihmang in ka omta, ka na chi maimah hi; himahleh k’on sap a hehpihna k’on ngetna awte nana za hi.

²³A Mi Siangthou tengtengte aw, TOUPA it un: TOUPA’N mi ginom a humbit a, kisathei tak a gamta nakpitak in a thuk zel hi.

²⁴TOUPA lamen tengtengte aw, hattak in om unla, na lungtang uh hangsak un.