Read Paite Chin SAM 33 Bible Online

SAM 33 - Paite Chin bible

SAM 33

¹Mi diktatte aw, TOUPA ah nuam in lasa un: midik ading in Pathian phat a kilawm him ahi.

²Kaihging in TOUPA kiang ah kipahthu gen unla; pekging gui sawm nei in amah phat in lasa un.

³Amah pahtawi in la thak sa unla; husa thupi toh siamtak in tum un.

⁴TOUPA thu a dik a; a thilhih tengteng muanhuai tak a hih ahi ngal a.

⁵Diktatna leh vaihawmna dik a it nak a; leitung TOUPA chitna in a dim hi.

⁶TOUPA thu in vante siam ahi a; huai a omte tengteng leng a kam a hu a siam ahi uhi.

⁷Aman tuipi tuite koih khawm bang in a bawl lem khawm a: tui thukpite koihkhawmna innte ah a koih hoih zel hi.

⁸Leitung luah tengteng in TOUPA laudan siam henla; khovel a om tengteng amah lau in om uhen.

⁹Aman a gen a, a hong omta a; thu a pia a, a hongom kipta hi.

¹⁰TOUPA’N namchih lunggelna bangmahlou in a omsak a: michih ngaihtuahnate bangmah phattuamna neilou in a siam hi.

¹¹TOUPA lunggelna bel tangtawn in a om kip ding a, a lungtang a ngaihtuahte khang tengteng tan in a om kip ding hi.

¹²TOUPA Pathian a nei nam a hampha uhi; amah gouluah dia a tel mite mah.

¹³TOUPA’N van a kipan in a en a; mihing tate tengteng a mu nak hi.

¹⁴Lei a om tengteng a omna mun a kipan in a hon en zel hi.

¹⁵Amaute tengteng lungtang sekpan a thilhih tengteng uh a enkhia hi.

¹⁶Kumpipa himhim sepaih tam ziak lel a humbit ahi ngeikei: mihat thahat ziak lel a tatkhiak ahi sam kei.

¹⁷Bitna ding in sakol bangmah ahi kei: a hat mahmah ziak lel in kuamah a humbit tuankei ding hi.

¹⁸Ngai dih, TOUPA mit tuh amah laudan siamte tung ah a tu gige a, a chitna lam ente tung ah.

¹⁹A hinna uh sihna lak a humbit ding leh kial tun a amau tungding ding in.

²⁰I hinna in TOUPA a ngak nilouh a; amah hon panpihpa leh i phaw uh ahi.

²¹Amah ah i lungtang a nuam ding ahi, a min siangthou i muan ziak in.

²²TOUPA aw, na chitna ka tung uah om hen, k’on lamet bangzel un.