Read Paite Chin SAM 34 Bible Online

SAM 34 - Paite Chin bible

SAM 34

¹Chiklaipeuh in leng TOUPA tuh ka phat ding a: amah phatna ka kam ah a pawt gige ding hi.

²Ka hinna in TOUPA a suang ding a: thunuailutte’n huai a za ding ua, a kipak ding uhi.

³Aw, TOUPA hon phatpih unla, a min pahtawi chiat ni.

⁴TOUPA ka zong a aman hon dawng a, ka kihtak peuhmah lak ah a hon humbit hi.

⁵Amah a en ua, huchi in a hong vakta uhi; a melte uh chikmah in a zum kei ding.

⁶Hiai mi genthei a kikou a, TOUPA a za a, a mangbatna tengteng ah a honkheta hi.

⁷Amah laudansiamte tuh a kimvel uah TOUPA angel in a opkhum a, a humbit hi.

⁸Aw, TOUPA hoihdan chiam him dih ua: amah a muanna koih mi a hampha hi.

⁹A misiangthoute aw, TOUPA laudansiam un: amah laudansiamte ading in taksapna himhim a omlouh ziak in.

¹⁰Humpinelkai lunlaite tuh a tasam un a gilkial naknak uhi: TOUPA zongte zaw thil hoih himhim a tasam kei ding uhi.

¹¹Kisa un, naupangte, ka thu ngaikhia un: TOUPA laudan k’on hilh ding hi.

¹²Hoihna a muh theihna ding un, hinna deih a damsawt ut mi kua ahia?

¹³Na lei tuh gilou lak ah veng hoih inla, na muk khemna thu genlou ding in veng hoih in.

¹⁴Gilou paisan inla, thil hoih hih in; lemna zong inla, a delh in delh in.

¹⁵TOUPA mit in mi diktatte a en gige a, a bil in a sap uh za ding in a ngaikhe gige hi.

¹⁶TOUPA mel in thil hihkhialte a dou a, amau theih gige na lei a kipan a hih mangthang ding in.

¹⁷Mi diktatte a kikou ua, TOUPA’N a za a, a mangbatna tengteng uah a honkheta hi.

¹⁸TOUPA’N lungtang khasiate a naih zel a, lungsim a kisik peuhmahte a hondam zel hi.

¹⁹Mi dik haksatnate a tam a, himahleh TOUPA’N huaite apan a honkhia ahi.

²⁰A guh tengteng a kem hoih a, khat lel leng hihtan ahi kei hi.

²¹Thil hoihlou in migilou saloute a that ding a: dik hawte’n siamlouh a tang ding uhi.

²²TOUPA’N a sikhate hinna a tan a; amah a muanna koihte khat lel leng siamlouh tang a omkei ding uhi.