Read Paite Chin SAM 35 Bible Online

SAM 35 - Paite Chin bible

SAM 35

¹TOUPA aw, hon sualte nang sual in: hondoute nang dou in.

²Phaw neu leh phaw lian len in, hon panpih din ding in:

³Tei leng phawi inla, hon delhte lam na dal in: ka hinna kiang ah, Na hondampa ka hi, chi in.

⁴Ka hinna hihmang tum a zongte zahlak sak a hihzum in om uhen, hon hihsiatna ding a thubawlte taizak sak in gen ding theilou hial in om uhen.

⁵Buhsi huih mutleng bang in om uhenla, TOUPA angel in delhzui zel hen.

⁶A lampi uh mialtak leh naltak hi henla, TOUPA angel in gawt hen.

⁷A ziak omlou in hon matna ding un a len uh kawkhuk ah a phah gu ua, a ziak omlou in ka hinna kiakna ding in kawkhuk a tou uhi.

⁸A kigin louhlai in siatna a tung uah tung henla; a len phahguk ah amah mah awk henla: huai ah ke sia hen.

⁹Huchi in ka hinna TOUPA ah a nuam ding hi: a hotdamna ah a kipak ding.

¹⁰Ka guh tengteng in, TOUPA, mi genthei lanzoh vuallouh lak a humbitpa ahi, tagah leh genthei, a hihgampa apan humbitpa, nang bang kua a om? a chi ding uhi.

¹¹Theihpih diktatlou hialte a hongding ua; ka thiltheih hetlouh thute a hon dong uhi.

¹²Ka hinna in thiltan khop in thil hoih thilsia in a hondin hi.

¹³Ken bel, a damlouh lai un, ka puansilh saiip ahi a: ka hinna anngawl in ka hih genthei ngal a; ka thumna keimah angsung ngei ah a hongkik nawn hi.

¹⁴Ka lawm hiam, ka unau hiam leng hi heh aw a tung ua ka omdan ding bang in ahi ka om: mi a nu kah bang in sun in ka kun hi.

¹⁵Himahleh kei ka bai leh amau a kipak ua, a kikhawm hial ua: mi vuak hatte honsual ding in a kikhawm ua, huai ka nathei ngal kei a: tawpnuam lou in a honhih ek uhi.

¹⁶Ankuangluina a chiamnuih gente bang phet in a ha uh hon gawikhum uhi.

¹⁷TOUPA, nang bang tan ahia na et ding? Ka hinna hihsiat a tupna lak uah hon hunkhia inla, ka neihsun pen humpinelkai lak ah honkhia in.

¹⁸Kikhopna thupitak ah kipahthu k’on hilh ding a: mi tampi lak ah k’on phat ding hi.

¹⁹Ka melmate’n diklou tak ah hon otsan kei uhen: bangmahlou a honhawte leng a mit un kihoupih sam kei uhen.

²⁰Kituahna thu himhim a gen ngal kei ua: hiai gam a om hiathiatte khemna thute a ngaihtuah zaw uhi.

²¹Ahi, a kam un hon kam kat khum ua; Ku! Ku! i mit in i muta a chi uhi.

²²TOUPA aw, nang na mu hi, daihsan ken. TOUPA aw, hon gamlat mahmah ken.

²³Ka Pathian leh ka TOUPA aw, ka vaihawm ding in, ahi, ka thu a hongum ding in, kihalhsak inla, hak in.

²⁴TOUPA ka Pathian aw, na diktatna bangzel in vai honhawm sak inla; amaute’n hon otsan kei uhen.

²⁵A lungsim un, Nuam e! Huchibang a keimaw i deih, chi kei uhen. Amah i valh khinta, chi sam kei uhen.

²⁶Ka siatna tung a kipakte zahlak leh gen ding bei in om chiat uhenla; ka tung a kiliansakte zahlakna leh zumna silhsak in om uhen.

²⁷Ka diktatna tung a kipakte nuam a kikou in kipaktak in om uhenla: Ahi, a sikha vangphatna a kipakte'n TOUPA pahtawi in om hen, chi gige uhen.

²⁸Huchi in, ka lei in na diktatna thu a gen ding a, na phatna thu nitum in a gen ding hi.