Read Paite Chin SAM 36 Bible Online

SAM 36 - Paite Chin bible

SAM 36

¹Migilou salou tatlekna in ka lungtang sung ah thu a gen a, A mit ah Pathian kihtakna a omkei, chi in.

²A thulimlouhna a mukhe kei ding ua, a pai tuankei ding uh, chi in. Amah mitmuh in a kiphat tawm hi.

³A kam a thupawtte thulimlouhna leh khemna thu gen ahi nak a: pil leh thil hoih hih a tawpta ahi.

⁴A lupna ah thil thulimlou a gel gige a; lampi hoihlou ah a pai teitei a: gilou a kih kei hi.

⁵TOUPA aw, na chitna tung van ah a om a; na ginomna in van dumte a su hi.

⁶Na diktatna Pathian tangte bang ahi; na vaihawmte tui thuk talkhauh bang ahi; TOUPA aw, mihing leh gamsa na humbit hi.

⁷Pathian aw, na chitna manpha hina e! Mihing tate na kha nuai ah a tu zel uhi.

⁸Amau na inn sung thil hoih in a tai ding ua; na kipahna lui a na dawn sak ding hi.

⁹Hinna tuikhuk nang ah a om a: na vak ah vak ka mu ding uhi.

¹⁰Aw, nangmah theite tung ah na chitna kitheisak inla; lungtang diktak pute tung ah leng na diktatna langsak in.

¹¹Kisathei khe honsual ding in kei lam ah kalsuan dah henla, migilou salou khut in hon delhmang kei hen.

¹²Huai ah thulimlouhna hihte a puk ua; Paihkhiak in a om ua, a thou thei nawn kei ding uhi.