Read Paite Chin SAM 37 Bible Online

SAM 37 - Paite Chin bible

SAM 37

¹Thil hoihlou hihte ziak in kihih lungkham nuam ke’nla, diklou tak a hihte leng eng ken.

²Loupa bang in at paih in a om zok ding ua, lou hing bang a vuai ding ahi ngal ua.

³TOUPA muang inla, thil hoih hih in; hiai gam ah om inla, ginomna delh zel in.

⁴TOUPA tung ah leng kipak in; huchi in na lungtang deihlamte a honpe ding hi.

⁵Na omdan ding TOUPA tung ah nga inla; amah muang in, aman ahihvek ding.

⁶Na dikdan vak bang in a suaksak ding a, na siamtandan leng sunlai bang mai in.

⁷TOUPA ah khawl inla, amah ngak nilouh in; a omdan a vangphatna mute ziak in kihih lungkham nuam dah in, ngaihtuahna giloute pichinmi ziak in.

⁸Heh tawpsan inla, thangpaih kisik in: ki hih lungkham nuam ken, thil hihkhelh ah a hong ke maimah nak hi.

⁹Thil hoihlou hihte hihmang in a om dek ngal ua: TOUPA ngakte’n gam a luah ding uhi.

¹⁰Sawtlou chik in migilou salou a om nawnta kei dia: ahi a omna mun uh enen mahle chin, a omta kei ding hi.

¹¹Thunuailutte’n gam a luah ding ua; kituahna thupitak ah a ki pak ding uhi.

¹²Migilou salou in mi diktat a sawm a, a ha a gawikhum nak hi.

¹³TOUPA’N amah a nuihsan ding. A ni a hongtung dek chih a theih ziak in.

¹⁴Genthei leh tagahte hihpuk ding leh omdan dikte that ding in migilou saloute’n namsau a phawi ua, a thalpeute uh a lai uhi.

¹⁵A namsau un amau lungtang a sun ding a, a thalpeute uh hihtan in a om ding hi.

¹⁶Mi diktat thil tawmchik neih migilou salou thil neih keihkuih sang in a hoihzaw ahi.

¹⁷Migilou salou bante hihtan in a om dek ngal a: mi dik TOUPA’N a len gige ding ahi.

¹⁸TOUPA’N mi hoihkimte nite a thei a; a gouluah ding uh tangtawn a om gige ding ahi.

¹⁹Hun hoihlou ah a zahlak kei ding ua; kial kum in leng a vah ding uhi.

²⁰Migilou saloute a mangthang ding ua, TOUPA doute leng gamlak loupa pak kilawm bang a hihmanthat in a om ding ua, meikhu in a zammang ding uhi.

²¹Migilou salou in a leitawi a, a pe nawn kei nak a; midik inbel mi a hehpih a, a pe zawnak hi.

²²A vualzawlna mute’n gam a luah ding ua, a hamsiatte hih manthat in a om ding uhi.

²³Mi kalsuante TOUPA hihkip ahi a; a lampi ah a kipak nak hi.

²⁴Puk mahleh, lupden sak in zaw a omkei ding hi; TOUPA’N a khut in a len gige ngal a.

²⁵Naupang ka na hita a, tuin tek ka hong hita a, himahleh mi diktat limsaklouh a a omlam ka mu ngeikei hi, a suante anngolh leng ka mu ngei sam kei hi.

²⁶Mi a hehpih gige a, a leitawi sak a; a suante leng a hampha nak uhi.

²⁷Gilou paisan inla, thil hoih hih in; huchi in tangtawn in teng gige in.

²⁸TOUPA’N vaihawm diktat a deih ngal a, a misiangthoute a paisan ngeikei hi, tangtawn a ding in kep hoih in a om uh: migilou salou suante bel hihmang in a om ding uhi.

²⁹Midikte’n gam a luah ding ua, a sung ah tangtawn in a om ding uh.

³⁰Mi dik kam in pilna thu a gen a, a lei in vaihawm diktatna thu a gen hi.

³¹A Pathian dan a lungtang ah a om a; a kalsuan a tolh kei ding hi.

³²Migilou salou in mi diktat a enkhia a, hihlup a tum gige hi.

³³TOUPA’N a khut ah a nuse kei ding a, a vaihawm hun chiang in siamlouh tansak a phal sam kei ding hi.

³⁴TOUPA ngak inla, a lampi tawn in, huchi in gam luah ding in a hon pahtawi ding hi: migilou saloute hih manthat a a om uh na mu ding hi.

³⁵Migilou salou nakpitak a thunei a, a pouna mun a singnou dawng thenthon bang a, ka biambuam ka mu hi.

³⁶Himahleh lampi ah mi a vapai ua, ngai dih, amah a na omkei maimah a; ahi, ka zong a, himahleh muhtheih ahi ta kei hi.

³⁷Mi gensiatbei chiamteh inla, mi diktak tuh en in, huchibang mite tawpna ding zaw khamuanna hi ding ahi ngal a.

³⁸Talekte bel a kituak a hihsiat in a om ding ua, migilou salou tawpna ding tuh hih manthat ahita ding hi.

³⁹Himahleh mi diktatte hotdamna TOUPA a kipan in ahi; amah mangbat lai a kulhpi muan ahi.

⁴⁰TOUPA’N amau a panpih in a humbit a, amah ah a kituklut ziak un migilou saloute lak ah humbit in a hondam hi.