Read Paite Chin SAM 39 Bible Online

SAM 39 - Paite Chin bible

SAM 39

¹Ka lei a thil ka hihkhelh louhna ding in ka omdante ka veng hoih ding a; migilou saloute ka ma a a omsung uh ka kam mukgakna in ka gak ding, ka chi.

²Huchi in daidide in pau lou in ka om a, a hoihlam ah leng ka daidide a; himahleh ka lungngaihna tohthoh in a om zawsop hi.

³Ka sung ah ka lung a sa vutvut a; ka ngaihtuah in mei tuh a kuang khia a; ka lei in thu ka genta hi.

⁴TOUPA, ka tawpna ding leh, ka damchiang ding, bangchi ahi, chih, hon theisak inla; ka hinna beikin dan hon theisak in.

⁵Ngai in, ka damsung khutpek tan phet in na siam a; ka kum na mitmuh in bangmah tham ahi kei a; michih a hoihlai pen un avek un bangmahlou lel ahi uhi. Selah

⁶Michih nuamsa bang in a vak ngei ua; a mawk buai ngei nak uhi. Gou a khawl khawm ua, a luah ding lah a theikei uhi.

⁷TOUPA aw, tun ah bang ka ngak dia? Nang ah a hi ka lametna a om.

⁸Ka tatlekna tengteng lak ah hon honkhia inla: mihai gensiat in hon omsak ken.

⁹Nangmah hih a hih ziak in ka pau kei a, ka kam leng ka ka kei hi.

¹⁰N’on satna ka kiang a kipan lasuan inla; na khut khak a hihman ka hi.

¹¹Mi a tatlekna ziak a thuhilh a na sawi in, a deihlai pen leikha bang in na hihsia a; michih bangmahlou lel ahi uhi. Selah

¹²TOUPA aw, ka thumna ngaikhia inla, ka kikou na ah na bildoh inla; ka khitui kia daihsan ken: na mikhual ka hi a, ka pipute bang in Khualzin tamlel bang ka hi ngal a.

¹³Aw, hiai a kipan ka pawt a, ka omlouh paisuak vengveng ma in, ka halh nawnna ding in honhawi in.