Read Paite Chin SAM 40 Bible Online

SAM 40 - Paite Chin bible

SAM 40

¹TOUPA ka ngakngak a: aman a hon ngeingaih a, ka kikou a zata hi.

²Manthatna kawkhuk a kipan, buannawi diadua apan a hon khai khetou a: huchi in ka khe suangpi tung ah a nga a, ka kalsuante a hihkip hi.

³La thak ka kam ah a koih a, i Pathian phatna: mi tampi’n huai a mu ding ua, a lau ding ua, TOUPA a muang ding uhi.

⁴TOUPA a muanna nei a, ki satheite leh thuzuau a kipan a kihemkhiate tuh a hampha hi.

⁵TOUPA ka Pathian aw, nang thillamdang na hihte leh koumau lam n’on ngaihtuahnate a tam mahmah a, huaite na ma a hihlat zoh vual ahi kei ding.

⁶Kithoihna leh thillat tung ah kipahna na neikei a; ka bilte n’on honsakta a; haltum a thillat leh khelhna ding a thillat na phut kei hi.

⁷Huaitak in, ken, Ngai in, ka hongpai hi; laibuzial ah ka thu gelh ahi.

⁸Ka Pathian aw, na deihlam hih ka kipahlam tak ahi; ahi, na danthu ka lungtang ah a om gige hi, ka chi a.

⁹Kikhopna thupitak ah diktatna thu hoih ka tangkoupih a; TOUPA aw, ngai in, ka kam ka it kei ding chih na thei hi.

¹⁰Na diktatna ka lungsung ah ka im kei a; na ginomna leh na hotdamna thu ka tangkoupih zaw ding; Na chitna leh na takna kikhopna thupitak a mite lak ah ka selkei ding hi.

¹¹TOUPA aw, na lainatnate ka lak ah it kenla; na chitna leh na takna in hon humbit gige in.

¹²Thil hoihlou sim zohlouh in hon umsuak a, ka thulimlouhnate’n hon delhpha a, huchi in ka dak theita kei a; huaite ka samzang sang in a tamzaw a, ka lungtang a tawlta hi.

¹³TOUPA aw, hehpih in hon humbit inla; TOUPA aw, hon panpih ding in kin in.

¹⁴Ka hinna hihmang tum a zongte zahlak leh zumtak in om chiat uhen; ka siatna tung a kipakte kiknawn in hih zum in om uhen.

¹⁵Awihang! awihang! chite a zahlak ziak un mangbang tak in om uhen.

¹⁶Nang hon zong tengteng nangmah ah nuamtak leh kipaktak in om uhenla; na hotdamna itte’n, TOUPA phat in om hen, chi gige uhen.

¹⁷Kei zaw genthei leh liangvai ka hi a, himahleh TOUPA’N a hon ngaihtuah a; nang hon panpihpa leh hon humbitpa na hi a; ka Pathian aw, sawt hal mahmah ken.