Read Paite Chin SAM 41 Bible Online

SAM 41 - Paite Chin bible

SAM 41

¹Gentheite ngaihtuah mi a hampha hi, Mangbat ni’n TOUPA’N amah a humbit ding.

²TOUPA’N amah humbit in a hihhing ding a, lei ah vualzawl in a om ding; amah doute’n utut a bawl ding un a pe kei ding.

³TOUPA’N a gimna lupna mun ah a hihhat ding a; nang a chi a nat lai in a lupna na bawlsak vek zel hi.

⁴TOUPA aw, hon hehpih inla, ka hinna hihdam in, na tung ah thil ka hihkhial ngal a, ka chi a.

⁵Hondoute’n, chikchiang in a si in, a min a mang diam aw! chi in, hon gensia uhi.

⁶A lak ua kuahiam in a hongveh lai in, thu bangmahlou maimai a gen zel a; a lungtang in thulimlouhna a lakhawm a; a pawt khiak tak in mi a hilh zel hi.

⁷Hon haw tengteng hon gensia in a kihuau ua: hon hihsiatna ding uh a ngaihtuah uhi.

⁸Natna hoihlou tak in a mankipta, tu a lum a thou nawn kei ding, a chi ua.

⁹Ahi, ka lawm kithuahpih theih, ka muantak, ka tanghou nekpih ngei in a khetul ka tung ah a likta hi.

¹⁰Himahleh, TOUPA aw, nang hon hehpih inla, amau ka thuk theihna ding in hon kaithou nawn in.

¹¹Hiai ah ka tung ah na kipak chih ka thei hi, hondou in a honzoh louh ziak in.

¹²Kei zaw lungsim hoihtak ka putna ah nangman n’on len chinten a, Na ma ah tangtawn adin n’on koih hi.

¹³TOUPA, Israel Pathian, tangtawn a kipan tangtawn pha in phat in om hen, Amen! Amen!