Read Paite Chin SAM 42 Bible Online

SAM 42 - Paite Chin bible

SAM 42

¹Sakhi tal, luita tui duh a nak hawkhawk bang in, Pathian aw, ka hinna nangmah duh in a nak hawkhawk ahi.

²Ka hinna Pathian duh in, Pathian hing duh in, a dangtak ahi; chikchiang in ahia Pathian ma ka tun ding a, a mai ka muh ding.

³Ka khitui sun leh zan in ka an ahi a, na Pathian koi a om ahia leh! honchi nilouhlouh ua.

⁴Hiai thil ka theigige a, ka hinna ka sung ah ka sungbua a, mipi lak a ka pai in, nuamna leh phatna ging toh, mi tampi khawlni a Pathian inn zuan a a ma uh ka kaih zel dante.

⁵Ka hinna aw, bang achia kun nilouh? Bang achia ka sung a buai? Pathian lamen in; a melma damna ziak in amah k’on phat ding ahi ngal a, hon panpihpa leh ka Pathian.

⁶Ka Pathian aw, ka hinna ka sung ah a kun nilouh; huaiziak in Jordan leh Hermon gam a kipan, Mizar tang a kipan in k’on theigige ahi.

⁷Na tui luang ging zuazuate ah tuithuk leh tuithuk a kisam ua: na tuikihawt leh na tui kisep teng in honvuk tumta hi.

⁸Himahleh, TOUPA’N a chitna sun in thu a pe ding a, a la in zan chiang in hon ompih ding hi, ka hinna Pathian kiang a thumna in.

⁹Pathian ka suangpi kiang ah, Bangdia hon mangngilh a Bangding a melma nuaisiahna ziak a lungkham a ka mau vialvial nak! ka chi ding hi.

¹⁰Ka guh a namsau om bang mai in hondoute’n hon gense gige ua; Na Pathian koi a om ahia leh! Honchi nilouhlouh ua.

¹¹Ka hinna aw, Bang achia kun nilouh? Bang achia ka sung a buai? Pathian lamen in: amah ka phat ding a, hon panpihpa leh ka Pathian ahi.