Read Paite Chin SAM 44 Bible Online

SAM 44 - Paite Chin bible

SAM 44

¹Pathian aw, nidanglai a a damlai ua na thilhihte ka pipute un honhilh uh ka bil un ka za ua.

²Namte na khut in na hawlkhia a, amau na phut a; mite na hihgim a, na paikhia hi.

³Gam luah ding a amau namsau a a lak uh ahi kei a, amau ban a kihumbit leng ahi kei uhi; a tung ua na kipah ziak in na khut taklam, na ban leh, na mel vak in ahizaw.

⁴Pathian aw, nang ka Kumpipa na hi: Jakob humbitna ding in thu pia in.

⁵Nangmah ziak in ka melmate uh ka si pai ding ua; na min ziak in honsualte ka chil ekek ding uhi.

⁶Ka thalpeu ka muang kei ding a, ka namsau in hon hondam sam kei ding.

⁷Hondoute lak ah n’on hondam zawta hi, hon hawte na zaklaksak behlap hi.

⁸Nitum in Pathian ka suang ding ua, na min tangtawn in ka phat ding uhi. Selah

⁹Tun zaw nang n’on khah khia a, n’on hihzum a; ka sepaih honte uh lak ah lah na pawtkhe ngeikei hi.

¹⁰Melmate lak ah n’on taizak sak a: hon hawte’n gallak a deihdeih uh a la uhi.

¹¹Nang nekding belam bang in n’on pia a; namchih lak ah n’on hihdalh behlap hi.

¹²Na mite bangmahlou in na khawngta a, a man uh lah a tam hetkei hi.

¹³Nang ka kim ua mite gensiat in n’on omsak a, ka kiangnai ua mite muhsit leh nuihsan in n’on omsak hi.

¹⁴Nang namchih lak ah a selam gentehna in n’on omsak a, michih lak a mite lu sinkhum in n’on omsak hi.

¹⁵Ka buaina nitum in ka ma ah a om gige a, ka zahlakna in hontuam zouta hi.

¹⁶Genthangmi leh gensemi aw ziak leh, melma leh phulami ziak in.

¹⁷Huai tengteng ka tung uah a tung a; himahleh k’on mangngilh ngeikei ua, na thukhun ah zuau in ka hih ngeikei uhi.

¹⁸Ka lungtang uh a kihei nawn kei a, ka kalsuante’n na lampi a paisan ngeikei hi.

¹⁹Nang sehalte omna ah n’on bawl ek a, sihna lim a n’on tuamna ding in.

²⁰I Pathian min i mangngilh a, gamdang pathian lam ah i khutte i zak leh

²¹Pathian in huai a zongkhe kei dia hia! Lungtang thugukte a theigige a.

²²Ahi, nangmah ziak in nitum in thah in ka om gige ua; belam goh dingte bang a seh ka hi uhi.

²³Toupa aw, halh tanla, bang achia ihmu! hak inla, tangtawn in honkhah khe ken.

²⁴Bangziak in ahia na mai na sel a, ka haksatdan uleh nuaisiah ka thuakdan uh na mangngilh nak.

²⁵Ka hinna uh leivui si in a kun a; ka gilpi uh lah lei ah a belh bikbek a.

²⁶Hon panpih ding in thou inla, na chitna ziak in hon tan in.