Read Paite Chin SAM 48 Bible Online

SAM 48 - Paite Chin bible

SAM 48

¹TOUPA a thupi a, nakpitak a phat ding ahi, i Pathian khopi ah, a tang siangthou ah.

²A sandan a kilawm, khovel tengteng kipahna, Zion tang ahi, mallam pang a. Kumpipa thupitak khopi.

³A inpi ah Pathian in insang a hihdan a kitheisak hi.

⁴Ngai in, kumpipate a kikhawm ua, a pai khawmta uhi.

⁵A mu ua, huchi in lamdang a sa ua; a mangbang ua, a paimang pah uhi.

⁶Huai ah linna in a man a; numei nauvei natna in a matlai bang in.

⁷Suahlam huih in Tarsis long liante a na hihse zel hi.

⁸Sepaihte TOUPA khopi ah, i Pathian khopi ah, bil a i zak bangtak in i muta: Pathian in huai khopi tangtawn a ding in a hihkip ding. Selah

⁹Pathian aw, na biakin sunggil ah na chitna ka ngaihtuahta uhi.

¹⁰Pathian aw, na min bang ngei in na phatna kawlmong pha in a om a: na khut taklam diktatna in a dim hi.

¹¹Na vaihawmnate ziak in Zion tang kipaktak in om henla, Judah tanute nuam in om uhen.

¹²Zion kim ah, a kimvel in pai unla: a galven insangte leng sim un.

¹³A kulhte chiamteh hoih unla, a inpite ngaihtuah un; khang hongom nawnte a na hilh theihna ding un.

¹⁴Hiai Pathian tangtawn tangtawn a i Pathian hi ding ahi a: sih tanpha a leng hon pipa ahi ding hi.