Read Paite Chin SAM 49 Bible Online

SAM 49 - Paite Chin bible

SAM 49

¹Mi khempeuhte aw, hiai ngaikhia unla; khovel a om tengteng aw, bildoh un.

²Mi neu leh mi lian, mi hau leh mi zawng in leng.

³Ka kam in pilna thu a gen ding a; ka lungtang ngaihtuah tuh theihsiamna thu ahi ding hi.

⁴Genteh thu ah ka bil ka doh ding a: ka thugil gen kaihging in ka gentel ding hi.

⁵Ni hoihloute ah, ka khetul bul a thulimlouhna in hon umsuak in leng, bangding in ka lau dia!

⁶Amau neih leh lam muang a, amau hauhna tampi suangte’n.

⁷Kuamah in a unau a tan theikei ding uh, Pathian kiang ah tatna leng a piaksak thei sam kei ding uhi.

⁸A hinna uh tatna din tatna man a tamlua a, tangtawn a leng a ngim a ngim louh mai ding ahi.

⁹A dam gige a, muatna a muhlouhna ding in.

¹⁰Mipilte a si ua, huai bang in, mihai leh mi mawlte leng a mang tuaktuak ua, a neih leh lam uh midangte a nawtsiat zelte uhi.

¹¹A lungsim ngaihtuah dan uh, a innte uh tangtawn a om ding bang leh, a om nate uh suan tengteng tan a om ding bang in ahi; a gamte uh amau min mah a tamsak uhi.

¹²Himahleh mihing pahtawi in a om gige kei ua: gamsa mangthangte bang ahi uhi.

¹³Hiai ki haimuante tuah ahi a, a tan ua kipakte tawpna. Selah

¹⁴Belamhon bang in Sheol ading a seh ahi, sihna amaute a vak ding hi: zingsang lam in mi diktatte’n a tung uah thu a nei ding ua; a omnate ua a omlouhna ding in, a kilawmna uh Sheol hihsiat ding ahi ding hi.

¹⁵Ka hinna bel Pathian in Sheol khua a kipan a tankhe ding a; aman a hon kipahpih ding hi. Selah

¹⁶Mi hihhauh a a hongom a, a inn sung thupina a hong thupi huthut in leng, lau ken.

¹⁷A sih hun chiang in bangmah a keng kei ding hi; a thupina in zui khelou ding ahi ngal a.

¹⁸A damlai in nuamsa mahleh, a damsung in phat loh mahleh.

¹⁹Amah suangtute lam ah a pai dia, vak a mu ngeikei ding uh.

²⁰Mihing, pahtawi a om a, theihsiamna nei tuanlou zaw, gamsa mangthang zelte bang phet ahi uhi.