Read Paite Chin SAM 50 Bible Online

SAM 50 - Paite Chin bible

SAM 50

¹Pathian, Pathian mahmah, TOUPA’N thu a gen a, leitung ni suahna lam a kipan a a tumna lam tan in a samta hi.

²Kilawm bukim, Zion a kipan in Pathian a vak kheta hi.

³I Pathian a hong ding a, a dai nilouh kei ding: amah ma ah mei a kuang zuazua ding a, a kim ah huihpi a nung ding hi.

⁴A mite vai a hawm theihna ding in tunglam vante leh lei a sam ding.

⁵Ka misiangthoute ka kiang ah pikhawm unla, kithoih a thukhungte ngei, chi in.

⁶Huchi in, vante’n a diktatna a tangkoupih ding ua, amah Pathian ngei vaihawmpa ahi ngal a. Selah

⁷Ka mite aw, ngaikhia unla, thu ka gen ding hi; Israel aw, ngaikhia in, k’on hilhchian sak ding hi: kei Pathian, na Pathian ngeingei ka hi.

⁸Na kithoihnate ziak in k’on tai kei ding; na haltum thillatte ka ma ah a om gige ngal a.

⁹Na inn a kipan bawngtal ka lakhe kei ding a, na ganhuang a kipan keltalte ka lakhe sam kei ding uhi.

¹⁰Gam nuai a sa chiteng kei a ahi a, tang sang khat tung a gan omte leng.

¹¹Tang a vasa tengteng ka theivek a: gamsate kei a ahi.

¹²Gilkial mah leng k’on hilh kei ding: leitung leh asung a thil om tengteng kei a ahi.

¹³Bawngtal sa ka ne in kel sisan ka dawn dia hiam?

¹⁴Pathian kiang ah kipahthugen kithoihna lan zaw inla; na thuchiam leng Tungnungpen lak ah tangtun in.

¹⁵Huan, mangbat ni’n honsam lechin, k’on humbit ding a, huchi in nang n’on pahtawi ding hi, a chi a.

¹⁶Migilou salou kiang ah bel, Pathian in, Ka thuseh bangchidan a na kam a lou na hia?

¹⁷Thuhilhna na hua a, ka thute na nunglam ah na pai zel ngal a.

¹⁸Guta na muh in phaze na sakpih a, angkawmpate na koppih gige behlap hi.

¹⁹Na kam gilou kiang ah na pia a, Na lei in khemna a bawl gige hi.

²⁰Tu kawm in na unau na kalh a; nangmah nu tapa ngei na hek hi.

²¹Huai thil na hih a, himahleh ka dai nilouh a; nangmah bang geih in n’on gingta hi: himahleh k’on tai a, na mitmuh in kizom zel in ka hihlang ding hi.

²²Nou Pathian mangngilhte aw, hiai ngaihtuah dih ua! Huchilou in zaw k’on botnen kha ding hi, noumau hon humbit ding lah a om dek ngal kei hi.

²³Kuapeuh kipahthugen kithoihna lan in a hon pahtawi zel hi, huan a omdan kem hoih kiang ah Pathian hotdamna ka ensak ding hi, a chi a.